آلمان ایچکی ایشلر وزیرلیگی مهاجرلرنی دېپورت قیلیش فقط جنایت صادر اېتگن باش‌پناه ایزلاوچیلر بیلن چېکلنمسلیگینی معلوم قیلدی.
اوشبو وزیرلیک امریکا آوازی‌نینگ جنایت صادر اېتمه‌گن مهاجرلرنی افغانستان‌گه دېپورت قیلیش حقیده‌گی سوالیگه جوابن، هېچ بیر قانون مهاجرلرنی دېپورت قیلیشنی فقط جنایتچیلر بیلن چېکله‌مه‌گنینی بیلدیرگن.
آلمان عامه‌وي اخبارات واسطه‌لری‌نینگ خبرلریگه کۉره، آلمان‌ده تخمیناً ۴۸۸ کیشی افغانستانلیک اۉز مملکتیگه دېپورت قیلینیشی کېره‌ک بۉلگنلر رۉیخطیگه کیریتیلگن.
دویچه‌وله خبریگه کۉره، دېپورت رۉیخطیده‌گی افغانستانلیکلرنینگ قریب ۵۵ فایزی هېچ قنده‌ی جنایي حکمگه اېگه اېمس.
مرکز-اۉنگ و مرکز-سۉل حزبلردن تشکیل تاپگن ایتلافی دولت کېلگنیدن بویان ۲۵۰ کیشی افغانستانلیک آلمان‌دن افغانستان‌گه قَیتریلگن.
آلمان ایچکی ایشلر وزیری الکساندر دوبرینت اوّلراق افغانستان‌گه قَیتریش اېندیلیکده فقط جنایتچیلر و «خوفلی شخصلر» بیلن چېکلنمسلیگینی، بلکه حکومت‌نینگ شرطنامه‌سیده قید اېتیلگن کېلیشووگه موافق، بوندن بویان آلمان‌نی ترک اېتیشی مجبوري بۉلگن باشقه شخصلر هم افغانستان‌گه قَیتریلیشینی معلوم قیلگن اېدی.
آلمان مهاجرلرنی دېپورت قیلیش مسأله‌سیده طالبان بیلن هم مذاکره آلیب باریب، کېلیشووگه اېریشگن.
