اسمیت ماچچارفلای‌دبی اوچاقی‌نینگ اوچووچیسی، واقعه‌دن کېین ایلک بار هندستان باش وزیری نارندی مودی بیلن ویدیو قۉنغعراق آرقه‌لی صحبتلشیب، اوچاق کابینه‌سیده نیمه‌لر صادر بۉلگنینی توشونتیردی.
جناب مودی بوگون (جمعه، ۱۰-میزان) ماچچار بیلن بۉلگن ویدیو قۉنغعراقنی نشر قیلدی.
او ماچچارنینگ ۱۷۴ کیشی یۉلاوچی‌نینگ حیاتینی سه‌قلب قالیشگه سبب بۉلگن جسارتلی حرکتلرینی یوقاری بهالب، هندستان او بیلن فخرلنیشینی ایتدی.
سمیت ماچچار واقعه‌نینگ باشلنیشی حقیده باتفصیل معلومات بېرمه‌گن بۉلسه-ده، حادثه‌‌نینگ اېنگ کېسکین لحظه‌لرینی توشونتیریب بېردی.
او شونده‌ی دېدی: «اوچاق قوله‌یاتگنینی و نیمه‌دیر قیلیشیم کېره‌کلیگینی انگله‌گنیمده، کابین پولیگه ییقیلیب توشگن اېدیم و ایکّینچی اوچووچی بیلن آلیشه‌یاتگن اېدیم.»
ماچچار قۉشیمچه قیلدی: «مېن جراحتلنگن حالده کابین پولیده یاتردیم، اما اۉزیمگه: «ینه بیر بار اورینیب کۉره‌ی، اېشیکنی ایچکریدن آچیشگه حرکت قیله‌ی»، دېب ایتردیم.»
ماچچار ۱۷ ییللیک ایش تجربه‌سیگه اېگه اېکنینی، شوندن ۱۱ ییلینی اوچووچی صفتیده اۉتکزگنینی ایتیب، شونده‌ی دېدی: «حتا کۉزلریم یومیلگن بۉلسه هم، اوچاقده نیمه صادر بۉله‌یاتگنینی توشونه آله‌من. اوچاق قوله‌یاتگنینی و پستله‌یاتگنینی حس قیلدیم.»
ماچچار اۉشه پیتده بو «سۉنگگی امکانیت و سۉنگگی اورینیش» اېکنیگه ایشانگن حالده، کابین اېشیگینی آچیش اوچون بار کوچینی صرفله‌دی، شونده باشقه‌لر ایچکریگه کیرا آلردی.
ماچچار شونده‌ی دېدی: «اۉشه پیتده کابین اېشیگینی کۉردیم و فقط اېشیکنی آچیشگه موفق بۉلدیم. قالگنلر ایچکریگه کیریشدی. البته، اۉشه لحظه‌ده مېن اۉز جانیم اوچون کوره‌شه‌یاتگن اېدیم، اما شو بیلن بیرگه باشقه‌لرنینگ هلاک بۉلیشیگه یۉل قۉیه آلمه‌سدیم.»
نارندا مودی ماچچارگه قره‌ته شونده‌ی دېدی: «سېنینگ جسارتینگ، صبرینگ، عقل-ذکاوتینگ و ثانیه نینگ بیر بۉله‌گیده تېز قرار قبول قیلگه نینگ شونچه انسان نینگ حیاتینی سه‌قلب قالدی.»
او قۉشیمچه قیلدی: «بوگون بوتون مملکت شونی ایتیشی ممکنکی، بیز هندولر باشقه‌لر نینگ جانیگه قصد قیله‌دیگن آدملر اېمسمیز، عکسینچه، انسانلر حیاتینی سه‌قله‌یدیگن انسانلرمیز.»
هندستان باش وزیری ماچچارگه شونده‌ی دېدی: «تنه‌نگ آغیر جراحتلنگن، حیات-ممات اوچون کوره‌شه‌یاتگن بیر پیتینگده هم هر بیر یۉلاوچی نینگ حیاتی حقیده قیغوردینگ.»
حاضر بیرلشگن عرب امیرلیکلری نینگ ابو-ظبی شهریده دوالنه‌یاتگن ماچچار مادی بیلن صحبتده شونده‌ی دېدی: «مېن جراحتلریمگه جراحت صفتیده قره‌مه‌یمن، چونکه بو مېنینگ ساغه‌ییشیمنی قیینلشتیره‌دی. مېن دوالنیشیمنی استه-سېکین دوام اېته‌یاتگن اوزاق سفر دېب بیله‌من، اما توزه‌لیشیمگه ایشانه‌من.»
فلای دبی اوچاقی چهارشنبه کونی (۸ میزان) دبی‌دن تیل آوگه اوچگنیدن تخمیناً ایکّی یریم ساعت اۉتیب، پرواز وقتیده تۉستدن بېش کیلومتردن آرتیق بلندلیککه قوله‌گن. بو ایکّینچی اوچووچی اوچاق تیزیملرینی باشقه‌ریشگه اورینگن و سمیت ماچچارگه هجوم قیلگن پیتده صادر بۉلگن. اوچاقده‌گی یۉلاوچیلر نینگ اکثریتی ایسرایللیک بۉلگن.
بیراق ماچچار اېشیکنی آچگنیدن سۉنگ، باشقه‌لر ایچکریگه کیریب، هجومچینی ضررسیزلنتیریشگه موفق بۉلگن.
اوچاق ایچیده بۉلگن ایکّی اېکیپاژ اعضاسی پروازنی باشقریشنی اۉز قۉلیگه آلیب، اوچاقنی سعوديه عربستانیده‌گی تابوک اېر‌پورتیگه قۉندیرگن.
اسرایل باش وزیری نتانیاهو سمیت ماچچارنی «حقیقي قهرمان» دېب اته‌گن. اونینگ ایتیشیچه، ایکّینچی اوچووچی عمان فقراسی بۉلگن و اسلامي اېکسترېمیستیک غایه‌لر تأثیریده بونده‌ی حرکتگه قۉل اورگن.
واقعه‌گه ایران نینگ علاقه‌دارلیگی حقیده تخمینلر ایلگری سوریلگن. مریکا جمهور رییسی دونالد ترامپ، اگر بو حادثه‌ده ایران نینگ قۉلی بارلیگی اثباتلنسه، اونگه جوده قتّيق ضربه بېریلیشینی ایتگن.
بیرلشگن عرب امیرلیکلری و سعوديه عربستانی اوشبو ایش بۉییچه قۉشمه تېرگاو آلیب بارماقده. هجومچی هم تیریک قالگن و حبسده سه‌قلنماقده.
