دیپلوماتیک منبعلردن بیری فرانسه طالبلر حکومتی بیلن افغانستان وطنداشلرینی چیقریب یوباریش جریانینی «یېنگیللشتیریش» مقصدیده «تخنیکي» مذاکره‌لرنی باشله‌گنینی معلوم قیلدی.
اوشبو منبع بوگون (چهارشنبه، ۱۵-میزان) فرانس پرس اخبارات آژانسی بېرگن صحبتیده شونده‌ی دېدی: «باشقه اروپا دولتلری کبی، فرانسه هم ناقانوني یشش مقامیگه اېگه بۉلگن و جماعت ترتیبیگه تهدید سالووچی افغان وطنداشلرینی تۉغریدن-تۉغری چیقریب یوباریشنی یېنگیللشتیریش مقصدیده طالبلر بیلن تخنیکي ملاقاتنی باشله‌دی.»
پاریس طالبلذ ۲۰۲۱-ییل اگوستیده حاکمیتگه قَیتگنیدن بېری طالبلر رسميلری بیلن هېچ قنده‌ی دیپلوماتیک علاقه‌گه اېگه اېمس.
فرانسه نینگ کابلده‌گی اېلچیخانه‌سی همان یاپیق.
شونگه قره‌مه‌ی، فرانسه، آلمان، بلجیم و سویدن کبی اروپا اتفاقی نینگ قریب ۲۰ ته دولتیگه قۉشیلیب، افغانستان فقرالرینی، اینیقسه محکمه‌لر تامانیدن حکم قیلینگن شخصلرنی قَیتریش جریانینی تېزلشتیریشگه حرکت قیلماقده.
اروپا اتفاقی تامانیدن رسماً تن آلینمه‌گن طالبلر رسميلری خلق‌ارا میدانده‌گی موقعینی مستحکملشگه اینتیلماقده
.
فرانسه تشقی ایشلر وزیرلیگی فرانس پرس نینگ طالبلر وکیللریگه جریانلرنی تېزلشتیریش اوچون فرانسه‌گه باریشگه رخصت بېریله‌دیمی، دېگن سواللریگه جواب بېرمه‌دی.
دیپلوماتیک منبع چیقریب یوباریلیشی ممکن بۉلگن شخصلر سانینی انیق ایتمه‌دی. بیراق بو مسأله‌دن خبردار باشقه بیر منبع اولرنینگ سانی «یوزلب» بۉلیشی ممکنلیگینی ایتدی.
دیپلوماتیک منبع شونده‌ی دېدی: «بو تخنیکي ملاقات‌نینگ افغانستانگه نسبتاً موضعیمیزنی اۉزگرتیریشگه علاقه‌سی یۉق.»
او قۉشیمچه قیلدی: «بیز افغان خلقینی، اینیقسه افغان عیاللرینی قۉللب-قوّتلشده دوام اېته‌میز.»
جون آییده طالبان حکومتی رسميلری و اروپا پارلمانی اعضالری اۉرته‌سیده بۉلیب اۉتگن اوچره‌شوو انسان حقوقلری تشکیلاتلری همده اروپا پارلمانیده‌گی چپ قنات گروهلری نینگ تنقیدیگه سبب بۉلگن اېدی.
طالبلر حاکمیتگه قَیتگنیدن بېری افغانستان وطنداشلری‌نینگ حقوق و اېرکینلیکلریگه نسبتاً کېسکین چېکلاولر جاري قیلگن.
حاضرده قیزلر و عیاللر تعلیم آلیش و اۉقیش امکانیتیدن محروم اېتیلگن، شونینگدېک، جماعت جایلریگه باریش و کۉپلب کسبلرده ایشلش تعقیقلنگن.
