فلسطین جمهور رییسی محمود عباس بوگون، شنبه، ۱۸ میزان کونی فرمان چیقریب، مملکتده جمهور رییسلیک و پارلمان سیلاولری بیر وقتده ۲۰۲۷-ییل ۱۱-سپتمبر کونی اۉتکزیلیشینی اعلان قیلدی.
فاسطین‌نینگ رسمي عامه‌وي اخبارات واسطه‌لری خبریگه کۉره، بو قرار اوّلراق بېلگیلنگن پارلمان سیلاولری مدتی نینگ کېچیکتیریلیشینی انگله‌ته‌دی.
محمود عباس اداره‌سی فلسطین‌نینگ وفا اخبارات آژانسی اعلان قیلگن بیاناتیده: «عباس شنبه کونی جمهور رییسلیک فرمانینی چیقردی. اونگه کۉره، جمهور رییسلیک و پارلمان سیلاولری ۲۰۲۷-ییل ۱۱ سپتمبر کونی بیر وقتده اۉتکزیله‌دی»، دېب معلوم قیلگن.
خلق‌ارا همجمعیت تامانیدن اۉتکزیلیشیگه کوچلی اورغو بېریب کېلینه‌یاتگن پارلمان سیلاولری جاري ییل نینگ ۲۸نوامبریده اۉتکزیلیشی کېره‌ک اېدی. پرزیدنتلیک سیلاولری اېسه ۲۰۲۷-ییل باشیده اۉتکزیلیشی کوتیله‌یاتگن اېدی.
حاضر ۹۰ یاشده بۉلگن محمود عباس ایکّی اۉن ییلدن آرتیق وقت دوامیده حاکمیتده قالماقده. او بیر نېچه بار پارلمان و پرزیدنتلیک سیلاولرینی اۉتکزیشنی وعده قیلگن، بیراق بو سیلاولر حاضرگچه اۉتکزیلمه‌دی.
فلسطین حدودی حاضر ایکّی بیر-بیریدن اجره‌لگن حدود — غربي ساحل و سۉنگگی اوچ ییللیک اوروش نتیجه‌سیده ویرانه‌گه ایلنگن غزه سکتوریدن عبارت.
محمود عباس باشچیلیگیده‌گی فلسطین اداره‌سی غربي ساحل نینگ اَیریم چېکلنگن حدودلرینی نظارت قیله‌دی. غزه سکتوری اېسه ۲۰۰۷-ییلدن بېری حماس نظارتیده.
