امریکا جمهور رییسی دونالد ترامپ ولادیمیر زلنسکينی کېسکین تنقید قیلیب، اوکراین‌گه ینگی جمهور رئیس کېره‌کلیگینی ایتدی.
رویتذر اخبارات آژانسی خبریگه کۉره، ترامپ شنبه کونی (۱۸ میزان) آق اویده ژورنالیستلر بیلن صحبتده زلنسکي نینگ روسيه نینگ نفت تاسیساتینی نشانگه آلیش سیاستینی کېسکین تنقید قیلگن.
ترامپ: «مېنیمچه، اوکراین ینگی جمهور رییسگه اېگه بۉلیش وقتی کېلدی»، دېگن.
او، شونینگدېک، زلمسکي‌نینگ روسيه نفتنی قَیته ایشلش فابریکه‌لریگه اویوشتیره‌یاتگن هجوملری گلولل دیزل یاقیلغیسی تأمیناتیگه ضرر یېتکزه‌یاتگنینی ایتگن.
ترامپ: «او دیزل یاقیلغیسینی نشانگه آلیب، دهقانلریمیز و چاروادارلریمیز اوچون معما توغدیرماقچی، چونکه روسيه دنیاگه کېره‌ک بۉلگن دیزل یاقیلغیسی نینگ کتّه قِسمینی یېتکزیب بېره‌دی»، دېگن.
اوکراین سۉنگگی آیلرده روسيه نینگ نفت تاسیساتینی نشانگه آلماقده. کيیف هر هفته یوزلب درونلرنی روسيه نینگ، اینیقسه، نفت انبارلری کبی اینفره‌توزیلمه‌لریگه قرشی یۉللب، مسکو نینگ نفت اقتصادیاتیگه تأثیر کۉرسه‌تیشگه اورینماقده.
بیراق امریکا جمهور رییسی دونالد ترامپ اۉتگن هفته روسيه جمهور ولادیمیر پوتین بیلن تېلفون آرقه‌لی صحبتده کېلیشووگه اېریشگن. اونگه کۉره، مسکو دیزل اېکسپورتیگه قۉییلگن چېکلاولرنی بېکار قیلگن و آمریکا اوچون ضرور بۉلگن دیزل یاقیلغیسینی یېتکزیب بېرووچیگه ایلنگن.
اوکراین بو کېلیشوودن کېسکین ناراضی. ولادیمیر زلنسکي دیزل بۉییچه کېلیشوو روسيه‌نی «ینه‌ده تکبر بۉلیشگه» اونده‌گنینی ایتگن.
زلنسکي‌نینگ تأکیدلشیچه، جمعه کونی پوتین و ترامپ اۉرته‌سیده‌گی دیزل کېلیشووی حقیده‌گی خبر نینگ اعلان قیلینیشی مسکو نینگ ینه‌ده تکبر بۉلیشیگه سبب بۉلگن.
کيیف بو نینگ اۉرنیگه واشنگتندن تۉرت یریم ییلدن بېری دوام اېته‌یاتگن اوروشنی توگه‌تیش بۉییچه جدّي مذاکره‌لر آلیب باریش اوچون مسکوگه باسیم اۉتکزیشنی سۉره‌گن.
شو بیلن بیرگه، ترامپ زلنسکي نینگ ناتۉغری دېب حسابله‌گن سیاستی سببلی بیر نېچه بار روسيه‌گه اېمس، بلکه اوکراین‌گه قرشی کېسکین پازیتسيه‌سینی بیلدیرگن.
ترامپ حاضرگچه کمیده آلتی مرته آچیقچه‌سیگه اوکراین‌ده جمهور رییسلیک سیلاولرینی اۉتکزیشگه چقیرگن و ۲۰۲۵-ییل فبرورییده زلنسکينی «سیلاوسیز دیکتاتور» دېب اته‌گن.
ولادیمیر زلنسکي ۲۰۱۹-ییل می آییده اوکراین جمهور رییسی بۉلگن. اونینگ قانوني جمهور رییسلیگی مدتی بېش ییل اېدی و ۲۰۲۴-ییلده یکونلنیشی کېره‌ک اېدی. بیراق روسيه بیلن اوروش دوام اېته‌یاتگنی و «حربي حالت» جاري اېتیلگنی سببلی ینگی سیلاولر اۉتکزیلمه‌گن.
اوکراین پارلمانی جاري ییل می آییده حربي حالت دوریده سیلاو اۉتکزیش ممکن اېمسلیگینی معلوم قیلگن.
