دنیا بۉیلب ۱۲ مملکتده‌گی هزاره فعاللری و هزاره‌لرگه قره‌شلی تشکیلاتلر مشهور مد «گابریلا هرست»، همده «فیروز کوه» جمغرمه‌سی تامانیدن پاریس مد هفته‌لیگیده نمایش اېتیلگن، افغانستان مدنیتی و هنرمندچیلیگیدن الهاملنیب یره‌تیلگن کییملر ناراضیلیک بیلدیردی.
اولر آچیق مکتوب اعلان قیلیب،«گابریلا هرست» و «فیروز کوه» جمغرمه‌سیدن «هزاره‌لر مدنیتی و اوشبو کاللیکسیه‌گه الهام منبعی بۉلگن هزاره عیاللرینی اعتبارسیز قالدیرگنی اوچون عامه آلدیده عذر سۉره‌شنی» طلب قیلگن.
مکتوبنی امضاله‌گنلر توشونتیریشیچه، ۵ـ اکتوبر کونی پاریس‌ده‌گی «پتی پاله» موزیمیده نمایش اېتیلگن ۲۰۲۷-ییل بهار-یاز مجموعه‌سی‌نینگ ۱۲-رقملی لباسی هزاره‌لرنینگ «دستمال مُهری» دېب اتله‌دیگن عنعنوي بویومی نینگ قَیته تلقینیدیر. بیراق لباس حقیده‌گی ایضاحلرده اوشبو میراث تېگیشلی بۉلگن خلق نینگ نامی عموماً تیلگه آلینمه‌گن.
اولرنینگ قۉشیمچه قیلیشیچه، «فیروز کوه» جمغرمه‌سی اانستاگراده‌گی پُستلریده اوشبو نقشنی «۱۹۵۰-ییللرده افغانستان نینگ غزنی شهریده یره‌تیلگن اثر» دېب تعریفله‌گن. شونینگدېک، او «افغان کشته‌دۉز عیاللری تامانیدن عنعنوي خامک تیکیش اصولیدن فایده‌لنیب قَیته یره‌تیلگنی» ایتیلگن.
مکتوب مؤلفلری‌نینگ تأکیدلشیچه، گابریل هرست هم انستاگرامده ۱۳-رقملی لباسنی «افغانستان‌نینگ فیروز کوه جمغرمه‌سیگه قره‌شلی هنرمند عیاللر ایشی» دېب تقدیم اېتگن.
اولرنینگ یازیشیچه، گابریل هرست و «فیروز کوه» جمغرمه‌سی‌نینگ ۱۲رقملی لباسی یولدوزسیمان کتک نقشلی، ایپکدن تۉقیلگن کۉیلک بۉلیب، اونینگ یوقاری قِسمی کشته بیلن بېزه‌تیلگن. اوشبو لباس هزاره‌لرنینگ «دستمال مُهری»دن الهاملنیب یره‌تیلگن. دستمال مُهری هزاره‌لر نماز اۉقیشده فایده‌لنه‌دیگن مُهرنی سقلش اوچون ایشله‌تیله‌دیگن متاعدیر.
هزاره فعاللری‌نینگ تأکیدلشیچه، سویس‌نینگ سیوریخ یونیورسیتیی اېتناگرافيه موزیمیده اوشبو بویوملرنینگ ۹۰۰ دن آرتیق نمونه‌سی سه‌قلنه‌دی. اولر گنینگ برچه‌سی غزنی ولایتی‌نینگ جاغوری حدودیده هزاره عیاللری تامانیدن تیارلنگن.
مکتوبنی امضاله‌گنلر بو مسأله‌گه اعتبار قره‌تیش مهم‌لیگینی تأکیدلب، هزاره خلقی بیر عصردن آرتیق وقت دوامیده تعقیبلر، جینوساید، جمعیتدن چېتله‌تیش و مدني میراثی‌نینگ اته‌یلب یۉق قیلینیشی بیلن یوزلشیب کېله‌یاتگنینی قید اېتگن.
اولر مادّي و ناماددي مدني میراثگه عاید خلق‌ارا قانونلر همده کانوانسیونلرگه اشاره قیلیب، اوشبو حجتلر نینگ برچه‌سی بیر نېچه مهم تمایلنی تأکیدلشینی بیلدیرگن. جمله‌دن، بیرار جماعه‌‌نینگ مدني میراثیدن فایده‌لنیش اوچون اۉشه جماعه نینگ اېرکین، خبردار و آلدیندن بیلدیریلگن راضیلیگی آلینیشی، جماعه بوندن آلینه‌دیگن منفعتلردن اولوش آلیشی همده اونینگ میراثی ناتۉغری یاکه بوزیب کۉرسه‌تیلمسلیگی کېره‌ک.
مکتوبنی امضاله‌گنلر شونده‌ی دېگن:
«مقصدیمیز باشقه‌لرنینگ افغانستان هنرمندچیلیگینی اولوغلشیگه تۉسقینلیک قیلیش اېمس. هزاره‌لر میراثی افغانستان تاریخی‌نینگ بیر قِسمیدیر، بیراق او مدنیتی اولادلر دوامیده اته‌یلب یۉق قیلینگن خلق نینگ اۉزیگه تېگیشلی. غزنیدن آلینگن اثر تقدیم اېتیلیب، اونی یره‌تگن هزاره عیاللری نینگ نامی تیلگه آلینمسه، بو اۉزلیکنی یۉق قیلیش جریانی نینگ دوام اېتیشیدیر. بیزنینگ مادّي و معنوي میراثیمیزنی اۉزیمیزدن اجره‌تیب بۉلمه‌یدی».
اوروگوایلیک مشهور مد دیزاینری گابریلا هرست «فیروز کوه» جمغرمه‌سی افغانستان مدنیتی همده هنرمندچیلیگیدن الهاملنیب، بهار-یاز موسمی اوچون یره‌تگن مجموعه‌نی جاري آی‌نینگ ۵-اکتوبر کونی پاریس ماده هفته‌لیگیده نمایش اېتگن.
