«افغانستان آزادلیک جبهه‌سی» لوگر ولایتیده طالبان استخبارات کوچلریگه قرشی اوشبو جبهه‌سی تامانیدن اویوشتیریلگن هجوم عاقبتیده گروه نینگ اوچ اعضاسی اۉلدیریلگنی و ینه ایکّی اعضاسی یره‌لنگنینی معلوم قیلدی.
مذکور جبهه‌سی بیاناتیده ایتیلیشیچه، هجوم تیناوون (سه‌شنبه، ۲۱-میزان) ساعت ۷:۱۰ لر اطرافیده لوگر مرکزی پا علم شهری نینگ بیرینچی خوفسیزلیک حدودیده، طالبلرنینگ اوشبو شهرده‌گی خوفسیزلیک قوماندانلیگی یقینیده عملگه آشیریلگن.
«افغانستان آزادلیک جبهه‌سی» اوشبو هجومده اۉز کوچلری آره‌سیده احتمالي تلفاتلر حقیده معلومات بېرمه‌گن.
لوگر ولایتیده‌گی طالبلرنینگ محلي مسووللری حاضرچه اوشبو هجوم یوزه‌سیدن ایضاح بېرمه‌گن.
«افغانستان آزادلیک فرونت جبهه‌سی» بوندن آلدین هم لوگر ولایتیده طالبلرگه قرشی هجوملر اویوشتیریلگنی حقیده خبر بېرگن.
طالبلر عادتده اۉزیگه قرشی قوراللی هجوملرگه سکوت سقله‌یدی. بیراق یقینده بدخشان و نورستان ولایتلریده «افغانستان آزادلیک جبهه‌سی» کوچلری بیلن یوز بېرگن تۉقنه‌شوولرنی تصدیقله‌گن و بو کوچلر پاکستان کۉمه‌گیده افغانستانگه کیریب کېلگنینی دعوا قیلگن.
پاکستان اېسه اوشبو هجوملرگه علاقه‌دارلیگینی قطعا رد اېتیب، طالبلرنینگ دعواسینی «پوج و اساسسیز» دېب اته‌گن.
