بریتانیانینگ دېنگیز تشکیلاتی خبر بېریشیچه، هرمز بۉغازیده نشانگه آلینگن ایکّی کېمه یېنگیل ضرر کۉرگن. عینِ پیتده ایران اسلام انقلابی قۉریقچیلری کارپوسی بیر کېمه‌‌نینگ دېنگیز ماینگه اوریلگنی حقیده خبر بېرگن.
فرانسه اخبارات آژانسی خبریگه کۉره، بریتانیانینگ دېنگیز سودا اۉپراسیون‌لری مرکزی سه‌شنبه کونی (۲۱ـ میزان) ایکّی کېمه «نامعلوم سنارید» بیلن نشانگه آلینگنینی بیلدیرگن. شو طریقه، اۉشه کونی هرمز بۉغازیده کېمه‌لرگه قرشی اویوشتیریلگن هجوملر سانی تۉرتته‌گه یېتگن.
مذکور تشکیلات معلوماتیگه کۉره، آغیرلیگی ۵۰ مینگ تُن بۉلگن کانتېنېر کېمه‌سی و ۱۹ مینگ تُن‌لیک باشقه بیر کېمه نشانگه آلینگن. بیراق اولر یېنگیل ضرر کۉرگنیدن سۉنگ اۉز یۉنه‌لیشیده حرکتلنیشده دوام اېتگن.
هجوملرده قربانلر حقیده معلومات بېریلمه‌گن.
مذکور تشکیلات بوندن اوّل سه‌شنبه کونی تانکر و کانتېنېر کېمه‌سیگه اویوشتیریلگن ینه ایکّی هجوم حقیده خبر بېرگن اېدی، بیراق بو هجوملر ضرر یاکه قربانلرگه سبب بۉلگن-بۉلمه‌گنینی انیقلشتیرمه‌گن.
بریتانیانینگ «وانگارد» خوفسیزلیک کمپنیسی هم تۉرتته کېمه هجومگه اوچره‌گنینی معلوم قیلدی. کمپنی کېمه‌لر نامینی «جی‌اف‌اس پراید» و «جی‌اف‌اس ژیزل» دېب کۉرسه‌تدی. اولر نینگ هر ایکّیسی هم سنگاپور بیعراغی آستیده سوزگن. شونینگدېک، بربه‌داس بیعراغی آستیده حرکتلنگن «آلفونسوا» کېمه‌سی هم هجومگه اوچره‌گن. تۉرتینچی کېمه «السعدیات» دېب اته‌لگن و مارشالل آراللری بیعراغی آستیده سوزگن.
وانگارد معلوماتیگه کۉره، «جی‌اف‌اس پراید» کانتېنېر کېمه‌سی چۉکیب کېتگن، «آلفونسو» تانکېری تقدیری اېسه هنوز نامعلوم.
قالگن ایکّی کېمه اۉز یۉنه‌لیشیده حرکتلنیشده دوام اېتگن.
ایران اسلام انقلابی قۉریقچیلری کارپوسی بوگون (چهارشنبه، ۲۲-میزان) بیر کېمه هرمز بۉغازیده دېنگیز ماینگه اوریلیشی عاقبتیده یانیب، چۉکیب کېتگنینی معلوم قیلدی. بیراق حادثه قچان صادر بۉلگنینی انیقلشتیرمه‌دی. ایران رسميلری نظرده توتگن کېمه دېنگیز تشکیلاتلری حساباتیده تیلگه آلینگن تۉرتته کېمه‌دن بیری بۉلگن-بۉلمه‌گنلیگی نامعلوم.
نفت تشیش اوچون مهم سوو یۉللریدن بیری بۉلگن هرمز بۉغازی یقین شرق اوروشیده‌گی اساسي تۉقنه‌شوولر مرکزیگه ایلنگن.
اوشبو اوروش فبروری آیی نینگ آخریده اقش و اسرایل نینگ ایرانگه قرشی هجوملری بیلن باشلنگن.
شوندن بېری تېهران هارموز بۉغازی اوستیدن نظارتنی قۉلگه آلگن و بو سوو یۉلیدن رخصتسیز اۉتیشده عیبله‌گن کېمه‌لرنی منتظم روشده نشانگه آلماقده.
بونگه جوابن واشنگتن ایران بندرلریگه دېنگیز بلاکده‌سینی جاري اېتدی. مقصد مملکت اقتصادیاتیگه باسیم اۉتکزیش و اونی ضعیفلشتیریشدن عبارت.
