پاکستانده‌گی قوتقروو خدمتی متصدیلری مملکت نینگ پیشاور شهریده بیر مکتب تامی قوله‌ب توشیشی عاقبتیده کمیده ۲۹ اۉقووچی و بیر عیال اۉقیتووچی هلاک بۉلگنینی، ینه ۲۰ نفر اۉقووچی یره‌لنگنینی معلوم قیلدی.
جیو نیوز خبریگه کۉره، مسووللر اوشبو خصوصي مکتب‌نینگ تامی بوگون، پنج‌شنبه (۲۳-میزان) کونی پیشاورنینگ «دیر کالونی» حدودیده قوله‌ب توشگنینی ایتگن.
قوتقروو خدمتی مسووللری‌نینگ بیلدیریشیچه، دستلب مکتب‌نینگ یوقاری قبتی نینگ تامی قوله‌گن، کېین اېسه بیرینچی قبت‌نینگ تامی اۉقووچیلر اوستیگه قوله‌ب توشگن.
خبرلرگه کۉره، اوشبو حادثه‌ده هلاک بۉلگن اۉقووچیلر نینگ اکثریتی ۱۳ یاشدن کیچیک بۉلگن.
پیشاور پولیسی قوله‌ب توشگن مکتب اېگه‌سی حبسگه آلینگنینی معلوم قیلدی. پولیس معلوماتیگه کۉره، اوشبو مکتب وقف اساسیده فعالیت یوریتگن.
پاکستان باش وزیری شهباز شریف حادثه یوز بېرگنیدن افسوسده اېکنینی بیلدیرگن و قوتقروو ایشلرینی تېزلشتیریش همده جراحتلنگنلرگه یاردم کۉرسه‌تیش بۉییچه تاپشیریق بېرگن.
خیبرپختونخوا ایالتی فرمانداری هم قربانلرنینگ عایله‌لریگه همدردلیک بیلدیرگن و حادثه‌نی تېرگاو قیلیش بۉییچه تاپشیریق بېرگن.
