خلق‌ارا پول جمغرمه‌سی باشلیغی کریستالینا جورجیوا بوگون‌نینگ، شنبه، ۲۵-میزان اوشبو تشکیلات‌نینگ جهان سیاستچیلری اشتراکیده‌گی ییللیک ییغیلیشلری یکونیده جهان اقتصادیاتی استقبالی بیر وقت‌نینگ اۉزیده «امید و خواطر» اویغاته‌یاتگنینی ایتدی.
فرانس پرس آژانسی خبریگه کۉره، اوشبو ییغیلیشلر هفته دوامیده تایلند پایتختی بانکوک شهریده دنیانینگ تورلی مملکتلریدن مالیه وزیرلری، مرکزي بانکلر رهبرلری و باشقه یوقاری مرتبه‌لی عملدارلر اشتراکیده اۉتکزیلدی.
تورم‌نینگ کېسکین آشیشی، ابلیکتسیه‌لر درآمدلیلیگی‌نینگ کۉتریلیشی و یسمه آنگ حسابیگه اقتصادي اۉسیش اوشبو ییغیلیشلرنینگ اساسي کون ترتیبیده‌گی موضوعلردن بۉلدی.
جورجیوا سعوديه عربستانی مالیه وزیری محمد الجدعان بیلن بیرگه‌لیکده اۉتکزگن مطبوعات انجمنیده: «بو ییغیلیشلر هم امید، هم خواطر بیلن کېچدی»، دېدی.
او قۉشیمچه قیلدی: «امید گلوبل اقتصادیات نینگ برقرارلیگی، یسمه آنگ‌نینگ استقباللی امکانیتلری و آسیاده‌گی اقتصادي فعاللیکدن کېلیب چیقماقده. اما یسمه آنگ نینگ اۉزی هم خواطر منبعلریدن بیری صفتیده کۉریلماقده. اینفلیه‌تسيه، یوقاری درجه‌ده‌گی قرضدارلیک، اوروشلر و اقلیم خوفلری هم باشقه خواطرلی عامللردیر.»
خلق‌ارا پول جمغرمه‌سی هفته دوامیده رواجلنگن اقتصادیاتلرده قرضدارلیک‌نینگ یوقاری درجه‌سی و ابلیکتسیه‌لر درآمدلیلیگی نینگ آشیشی مالیوي شرایطلرنی ینه‌ده قیینلشتیره‌یاتگنیدن آگاهلنتیردی. بو اېسه مرکزي بانکلر اینفلیاتسيه‌نی جلولشگه اعتبار قره‌تیشی کېره‌ک بۉلگن بیر پیتگه تۉغری کېلماقده. بو نینگ اوچون اېسه فایز ستاوکالرینی آشیریش طلب قیلینیشی ممکن.
فبروری آیی نینگ آخریدن، امریکا و اسرایل ایران بیلن اوروشنی باشله‌گن پیتدن بېری جهان انرژی نرخلری کېسکین آشدی. تهران‌نینگ جواب چاره‌لریده اېسه امریکا نینگ فارس کۉرفزیده‌گی اتفاقچیلری نشانگه آلینیب، نفت و گاز تأمیناتی چېکلنگن.
نرخلرمینگ آشیشی بوتون دنیاگه ترقه‌لیب، تورلی درآمد درجه‌سیگه اېگه مملکتلر اقتصادیاتیده اینفلیاتسيه‌‌نینگ کوچه‌ییشیگه سبب بۉلدی.
جورجیوا نینگ ایتیشیچه، بو ضربه‌گه اېنگ کۉپ ضعیف مملکتلر نفت ایمپورت قیلووچی کم درآمدلی دولتلردیر. بو دولتلر رواجلنگن اقتصادیاتلرنینگ کۉپچیلیگیده اقتصادي اۉسیشنی کوچه‌یتیریشگه یاردم بېرگن یسمه آنگ جدل رواجلنیشیدن فایده کۉره آلمه‌گن.
جورجیوا: «ایتیشیم ممکنکی، همه جایده، اینیقسه کمبغلراق مملکتلرده آدملر اینفلیاتسيه‌نی یاقتیرمه‌یدی. اینفلیاتسيه کمبغللر اوچون سالیق کبی»، دېدی.
اونینگ ایتیشیچه، بو مملکتلر خرجتلر بۉییچه مقصدلرینی اقتصادي اۉسیش و اهالی‌نینگ اېنگ ضعیف قتلملرینی قۉللب-قوّتلشنی اوستوار یۉنه‌لیش قیلیب بېلگیلشی کېره‌ک.
او، شونینگدېک، خوج کم درآمدلی مملکتلر اوچون کۉپراق مبلغ جلب قیلیشگه تینیمسیز حرکت قیله‌یاتگنینی تأکیدله‌دی.
جورجیوانینگ ایتیشیچه، بیراق دنیا مقیاسیده فایز ستاوکاری و ابلیکتسیه‌لر درآمدلیلیگی نینگ آشیشی کم درآمدلی مملکتلرنینگ قرضلرینی قَیتریش خرجتلرینی آشیرگن.
خوج باشلیغی سۉنگگی ییللرده کم درآمدلی مملکتلرده دولت درآمدلری نینگ قرضنی قَیتریشگه صرفلنه‌دیگن اولوشی سکّیز فایزدن ۱۴ فایزگچه آشگنینی بیلدیردی.
اونینگ ایتیشیچه، تشکیلات ضرور حاللرده مملکتلرگه قرضلرینی قَیته توزیشده یاردم بېریش، ایچکی رېسورسلرنی سفربر اېتیشگه کۉمکلشیش، خلق‌ارا مالیه‌لشتیریش امکانیتلرینی یره‌تیش و خصوصي سکتور اینوېستیتسيه‌لری اوچون ضرور شرایطلرنی شکللنتیریش مسوولیتیگه اېگه.
جورجیوا: «برچه امکانیتلریمیزنی ایشگه سالگنیمیزده، بونینگ نتیجه‌سی آدملر حیاتی‌نینگ یخشیلنیشیدیر»، دېدی.
خوج رهبری یسمه آنگ اینوېستیتسيه‌لر جدل رواجلنه‌یاتگنی حقیده گپیرر اېکن، اعضا دولتلر اوشبو تکنالوژي نینگ اقتصادي اۉسیشنی کوچه‌یتیریشده‌گی اهمیتینی تن آلگنینی ایتدی. بیراق او: «معین بیر اۉسیش عاملیگه، مثلاً، صنعي اینتېلېکتگه ته‌یه‌نیش — خودّی بیر آیاقده توریشگه اۉخشه‌یدی»، دېدی.
بو ییلگی ییغیلیشلرنینگ مهم موضوعلریدن بیری اېنگ ایلغار یسمه آنگ مۉدللریگه ترتیبگه سالیش و حمایه میکانیزملری کېره‌کمی یاکه یۉقمی، دېگن مسأله بۉلدی.
بو سوال خودمختار یسمه آنگ اگېنتلری بیلن باغلیق سۉنگگی خوفسیزلیک حادثه‌لری آشکار اېتیلگنیدن کېین ینه‌ده دالضرب بۉلدی.
جورجیوا بنکوکده بو مسأله یوزه‌سیدن یسمه آنگ کمپنیلری، حکومتلر و باشقه منفعتدار تامانلر اۉرته‌سیده‌گی همکارلیک روحیدن «تأثیرلنگنینی» ایتدی.
