جهان آزیق-طعام دستوری مبلغ یېتیشمسلیگی سببلی غزهدهگی یریم میلیون کیشیگه آزیق-طعام یاردمینی توخته‌تیشگه مجبور بۉلگنینی معلوم قیلدی.
اوشبو تشکیلات بوگون (دوشنبه، ۲۷میزان) نشر قیلگن بیاناتیده جاري آیدن باشلب غزهدهگی ۱.۱ میلیون کیشیگه آزیق-طعام و نقد پول یاردمی کۉرسه‌تیلیشینی بیلدیرگن. بو کۉرستکیچ اۉتگن آیده یاردم آلگن ۱.۶ میلیون کیشیگه نسبتاً ۵۰۰ مینگ کیشیگه کمدیر.
جهان آزیق-طعام دستوری آزیق-طعام سهمیه‌لرنی هم ایکّی برابرگه قیسقه‌رتیرگنینی بیلدیرگن. یعنی عایله‌لر اېندیلیکده اوّلگی ایکّی آزیق-طعام تۉپلمی اۉرنیگه بیر تۉپلم و کیچیکراق بیر قاپ بوغدای اونی آله‌دی.
تشکیلات، شونینگدېک، ایسّیق طعام ترقه‌تیله‌دیگن پارسيه‌لر سانینی ۲۵۰مینگدن ۱۵۰ مینگته‌گچه کمه‌یتیرگنینی معلوم قیلگن. قیین یېتیب باریله‌دیگن حدودلرده، جمله‌دن ایسرایل حربيلری نظارتیده‌گی «سریق چیزیق» یقینیده یشاوچی عایله‌لر اېندیلیکده هر کونی اېمس، کوناره ایسّیق طعام آله‌دی.
جهان آزیق-طعام دستوری ۷۵ مینگ عایله‌گه بېریله‌دیگن نقد پول یاردمی مقدارینی هم کمه‌یتیرگنینی بیلدیرگن.
شونگه قره‌مه‌ی، تشکیلات حاضرچه غزه‌نینگ نان احتیاجی‌نینگ اوچدن بیر قِسمینی تأمینله‌یاتگن نانوایخانه‌لرنی قۉللب-قوّتلش، ۳۰۰ مینگ عیال و باله‌گه آذوقه‌وي یاردم کۉرسه‌تیش همده غزهدهگی ۲۰۰ مینگ باله اوچون مکتبلرده ساغلام تمدّیلر بیلن تأمینلش امکانیتیگه اېگه اېکنینی ایتگن.
جهان آزیق-طعام دستوری ینگی بیاناتیده مبلغ یېتیشمسلیگی باسیب آلینگن غربي ساحلده‌گی یاردم دستورلریگه هم تأثیر کۉرسه‌تگنینی بیلدیرگن. جمله‌دن، سپتامبر آییده یاردم آلووچیلر سانی ایکّی برابرگه قیسقرتیریلیب، ۴۰۰ مینگ کیشیدن ۲۰ك مینگ کیشیگه توشیریلگن.
غزه‌ده آزیق-طعام خوفسیزلیگی
جهان آزیق-طعام دستوری‌نینگ بیلدیریشیچه، غزه‌ده تخمیناً ۱.۴ میلیون کیشی، یعنی اهالی‌نینگ ۶۷ فایزی آزیق-طعام خوفسیزلیگی بۉییچه «انقراض» یاکه اوندن هم آغیر درجه‌ده‌گی کېسکین معماگه دوچ کېلماقده. بو حالت «آزیق-طعام خوفسیزلیگی باسقیچلری‌نینگ یگانه انتیگراسیون‌لشگن تصنیفی» بۉییچه اوچینچی یاکه اوندن یوقاری درجه‌گه تۉغری کېله‌دی.
تشکیلاتگه کۉره، بو رقم ۲۰۲۵ییل آخریده‌گی کۉرستکیچ — ۱.۶ میلیون کیشی یاکه اهالی‌نینگ ۷۷ فایزیگه نسبتاً کمه‌یگن. بیراق بو یخشیلنیش حلی هم جوده کیچیک و ضعیفدیر.
جهان آزیق-طعام دستوری قریب ۲۰۰مینگ کیشی هنوزگچه «فوق العاده» شرایطده، یعنی آزیق-طعام خوفسیزلیگی باسقیچلری‌نینگ یگانه انتیگراسیون‌لشگن تصنیفی بۉییچه تۉرتینچی درجه‌ده یشه‌یاتگنینی معلوم قیلگن. بونده‌ی وضعیتده آچلیک سببلی اۉلیملر نینگ آلدینی آلیش اوچون زودلیک بیلن آزیق-طعام یاردمی ضرور.
تشکیلات‌نینگ قۉشیمچه قیلیشیچه، باله‌لرنینگ اتیگی بېشدن بیر قِسمی یېترلی درجه‌ده خیلمه-خیل آزیق-طعام ره‌تسیانیگه اېگه. شونینگدېک، طبي خدمتلر، ایچیملیک سووی، کانالیزاسیون تیزیمی و شخصي گیگیینه واسطه‌لریدن فایده‌لنیش امکانیتی همان چېکلنگن.
جهان آزیق-طعام دستوریگه کۉره، غزا اهالیسی نینگ ۸۰ فایزدن آرتیغی ایشسیز. بو اېسه کۉپلب عایله‌لر ینگی یاکه آقسیلگه بای آزیق-طعام محصولاتلری موجود بۉلگن تقدیرده هم، اولرنی ساتیب آلیش امکانیتیگه اېگه اېمسلیگینی انگله‌ته‌دی.
جهان آزیق-طعام دستوری ۲۰۲۵-ییل اکتوبریدن باشلب غزه‌ده انسان پرورلیک یاردمگه کیریش و یاردملرنی ترقه‌تیش امکانیتی‌نینگ یخشیلنگنی آزیق-طعام خوفسیزلیگی بیلن باغلیق معمالر نینگ کمه‌ییشیگه یاردم بېرگنینی بیلدیرگن. بیراق بو یوتوقلر جوده ضعیف بۉلیب، گومانیتار یاردم اوچون اجره‌تیله‌دیگن مبلغلر نینگ قیسقه‌ریشی دوام اېتسه، اولر تېزده یۉقالیب کېتیشی ممکن.
تشکیلات‌نینگ ایتیشیچه، «آزیق-طعام خوفسیزلیگی باسقیچلری‌نینگ یگانه انتیگراسیون‌لشگن تصنیفی» نینگ سۉنگگی تحلیلی گومانیتار یاردم نینگ قیسقریشی غزه‌ده آزیق-طعام یاردمیگه بۉلگن احتیاج‌نینگ کېسکین آشیشیگه آلیب کېلیشی ممکنلیگیدن آگاهلنتیرماقده.
جهان آزیق-طعام دستوری قیش موسمی یقینلشه‌یاتگن بیر پیتده غزه‌ده فوق العاده آزیق-طعام یاردملرینی دوام اېتتیریش، مهم تخنیکي و مهندسلیک کۉمه‌گینی تقدیم اېتیش همده یاش باله‌لر، حامله‌دار و اېمیزیکلی عیاللر اۉرته‌سیده تۉییب طعاملنمسلیک نینگ آلدینی آلیش اوچون زودلیک بیلن قۉشیمچه مبلغلرگه احتیاج بارلیگینی بیلدیرگن.
تشکیلات ۲۰۲۶-ییلده فلسطین خلقیگه یاردم کۉرسه‌تیش اوچون اجره‌تیلگن مبلغ اوّلگی ییللرده‌گی مبلغلرنینگ یرمیدن هم کم بۉلگنینی معلوم قیلگن. شونینگدېک، ۲۰۲۶ییل اکتوبریدن ۲۰۲۷-ییل مرتیگچه فلسطین خلقیگه یاردم کۉرسه‌تیشنی دوام اېتتیریش اوچون زودلیک بیلن ۴۵۰میلیون دالر مبلغ ضرورلیگینی بیلدیرگن.
سۉنگگی ییللرده خلق‌ارا تشکیلاتلر دنیانینگ تورلی مملکتلریده، جمله‌دن غزه، افغانستان و سودانده یوزه‌گه کېلگن بیر قطار گومانیتار انقراضلر همده دونر مملکتلر تامانیدن اجره‌تیله‌یاتگن یاردملر نینگ کمه‌ییشی سببلی جدّي مبلغ تنقیصلیگیگه دوچ کېلماقده.
جهان آزیق-طعام دستوری و باشقه گومانیتار تشکیلاتلر افغانستانده یاردمگه محتاج اهالیگه کمک کۉرسه‌تیش اوچون هم مبلغ یېتیشمه‌یاتگنیدن شکایت قیلیب، بو نینگ عاقبتلری حقیده آگاهلنتیریب کېلماقده.
