ایران تشقی ایشلر وزیری عباس عراقچی امریکا ایران بیلن کېلیشووگه اېریشیشگه هېچ قنده‌ی ایستک بیلدیره‌یاتگنینی کۉرستمه‌یاتگنی، عینِ پیتده تهدید و زۉرآورلیکنی ینه‌ده کوچه‌یتیریشده دوام اېته‌یاتگنینی ایتدی.
عراقچی بوگون (چهارشنبه، ۲۹ میزان) فایننشال‌تایمز گزیته‌سیده چاپ اېتیلگن مقاله‌سیده، موجود شرایطنی حسابگه آلگن حالده، «حاضرگی وضعیتده مذاکره‌لرده ترقیات بۉلیشینی کوتیش اوچون سببلر جوده کم»، دېب یازگن.
اونینگ قۉشیمچه قیلیشیچه، «ایران بو ماجراگه تینچ یۉل بیلن و اۉز قدر-قیمتینی سقله‌گن حالده یېچیم تاپیشگه قطعي اینتیلماقده. شو بیلن بیرگه، اۉزینی حمایه قیلیشگه هم تۉلیق تیار».
ایران تشقی ایشلر وزیری دوامیده ترقیات اوچون یۉل بارلیگینی، بیراق بو فقط امریکا حکومتی حربي یۉل بیلن معمانی حل قیلیش نینگ امکانی یۉقلیگینی چین دلدن تن آلگن تقدیرده‌‌گینه عملگه آشیشی ممکنلیگینی تأکیدله‌گن.
او آگاهلنتیریب، «اگر امریکا ینه بیر بار دیپلوماتیکدن کۉره حربي حرکتنی افضل کۉرسه، ایشانچ بیلن و قطعي ایتیشیم ممکنکی، بو نینگ نتیجه‌سی ینه‌ده کتّه استراتژیک مغلوبیت بۉله‌دی»، دېب یازگن.
عراقچی مقاله‌سی‌نینگ یکونیده ایران دیپلوماتيه‌گه ینه بیر امکانیت بېریشگه تیارلیگینی، بیراق بونینگ اوچون امریکا نینگ ماجرانی دایمي روشده توگه‌تیش مقصدیده عدالتلی و اۉزارا حرمتگه اساسلنگن یېچیم تاپیشگه صمیمي ایسته‌گی بارلیگینی کۉرسه‌تووچی کوچلی دلیللر بۉلیشی کېره‌کلیگینی تأکیدله‌گن.
مذکور مقاله پاکستان اوردوسی و قوراللی کوچلری قوماندانی عاصم منیرنینگ تهرانگه تشریفی و ایران‌نینگ یوقاری مرتبه‌لی عملدارلری بیلن اوچره‌شوویدن بیر کون اۉتیب چاپ اېتیلگن.
پاکستان قطر بیلن بیرگه‌لیکده ایران و امریکا اۉرته‌سیده‌گی مذاکره‌لرده واسطه‌چیلیک قیلماقده. ایتیلیشیچه، عاصم منیرنینگ تهرانگه تشریفی تهران و واشنگتن اۉرته‌سیده خبر المشیش همده ایکّی تامان نینگ مذاکره چوکییگه قَیتیشیگه کۉمکلشیش مقصدیده عملگه آشیریلگن.
ایران رسميلری پاکستان اوردوسی قوماندانی بیلن اوچره‌شووده امریکاگه هېچ قنده‌ی ایشانچلری یۉقلیگینی تأکیدلب، ایشانچنی تیکلش اوچون قۉشمه شتاتلر ایران‌نینگ شرطلرینی قبول قیلیشی کېره‌کلیگینی بیلدیرگن.
