بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) باشلیغی رباب فاطمه کابلدن یۉله‌گن ایلک رسمي پیامیده افغانستان خلقی‌نینگ قابلیتی و آرزو-اینتیلیشلری مملکت آلدیده تورگن معمالردن کتّه‌راق اېکنینی ایتدی.
اۉتگن هفته کابلگه کېلگن یوناما باشلیغی بوگون، شنبه، ۲ عقرب «بیرلشگن ملتلر تشکیلاتی کونی» و بیرلشگن ملتلر تشکیلاتی‌نینگ تشکیل تاپگنی نینگ ۸۱ ییللیگی مناسبتی بیلن ویدیو نشر قیلدی.
رباب فاطمه مراجعتیده شونده‌ی دېدی: «افغانستان آلدیده تورگن معمالر جدّي؛ اما بو مملکت خلقی نینگ استعدادی، آرزو-اینتیلیشلری و صلاحیتی اوندن هم کتّه‌راق».
اونینگ قۉشیمچه قیلیشیچه، بیرلشگن ملتلر تشکیلاتی افغانستان خلقینی قۉللب-قوّتلشگه صادق بۉلیب قاله‌دی همده انسان قدر-قیمتینی حمایه قیلیش، یخشیراق امکانیتلر یره‌تیش و افغانستان‌نینگ برچه فقرالری حیاتینی یخشیلش یۉلیده حرکت قیله‌دی.
رباب فاطمه افغانستانده‌گی وظیفه‌لرینی بو مملکت خلقی و مدنیتیگه چوقور حرمت بیلن قبول قیلگنینی ایتیب، خلق نینگ فکرلرینی تینگلش و اولر بیلن ملاقات قیلیشگه صادق اېکنینی بیلدیردی.
یوناما باشلیغی افغانستان خلقیگه اۉز کېله‌جگینی اۉزی بېلگیلشیده یاردم بېریش اوچون بوندن بویان هم «صادق همکار» بۉلیب قالیشیگه ایشانتیردی.
افغانستان ۱۹۴۶-ییلده، بیرلشگن ملتلر تشکیلاتی، تشکیل تاپگنیدن بیر ییل اۉتیب، اوشبو تشکیلاتگه اعضا بۉلگن.
بیرلشگن ملتلر تشکیلاتی‌نینگ باش کاتبی گوترش تشکیلات تشکیل تاپگنی نینگ ۸۱ ییللیگی مناسبتی بیلن نشر قیلگن مراجعتیده بوگونگی دنیا هر قچانگیدن هم کۉپراق بیرلشگن ملتلر تشکیلاتیگه محتاج اېکنینی ایتدی.
او بمت نینگ اساسي تمایللریگه اورغو بېریب، عمومي مقصدلرگه اېریشیش اوچون دولتلر بۉلینیش اۉرنیگه ملاقاتنی، قره‌مه-قرشیلیک اۉرنیگه همکارلیکنی و قۉرقوو اۉرنیگه بیردملیکنی تنلشی همده کوچه‌یتیریشی کېره‌کلیگینی تأکیدله‌دی.
