خلق ارا یېتکرمهلر خبرلریگه کۉره، روسيه نینگ اوکراین پایتختی کییفگه اویوشتیرگن نوبتدهگی راکت و درون هجوملری عاقبتیده کمیده۱۸ کیشی جان بېرگن، ینه ۹۰ کیشی جراحتلنگن.
رویترز خبریگه کۉره، اوشبو هجوملر بوگون (پنجشنبه، ۱۱-سرطان) تانگنینگ ایلک ساعتلریده عملگه آشیریلگن.
قربانلر آرهسیده بالهلر، قوتقرووچیلر و تېز یاردم موترلری هیداوچیلری هم بار.
اوکراین جمهور رییسی والادیمیر زېلېنسکي نینگ ایتیشیچه، روسيه کییف تامان قریب۷۰ته راکت، اولرنینگ یرمی بالیستیک راکتلر، همده۵۰۰ته هجومچی درون، جملهدن «شاهد» درونلرینی اوچیرگن.
اونینگ سۉزلریگه کۉره، هجوملرده تورر جای بنالری، تېز یاردم ستشنسی، علمي-تدقیقات مرکزی، مهمانخانه و بیر قطار بیزنس مرکزلری نشانگه آلینگن.
زېلېنسکي مملکت هوا مدافعهسی تیزیمی درونلر و راکتلرنینگ کتّه قِسمینی اوریب توشیرگنینی، بیراق اولرنینگ برچهسینی تۉختهته آلمهگنینی تأکیدلهدی.
رویترز خبریگه کۉره، روسيه مدافعه وزیرلیگی مملکت کییفدهگی حربي و انرژی انشااتلری، شونینگدېک، قۉنالغهنی نشانگه آلگنینی معلوم قیلگن.
روسیه مدافعه وزیرلیگی اوشبو هجوملر اوکراین نینگ روسيهدهگی ملی آستقورمهلریگه اویوشتیرگن ضربهلریگه جوابن عملگه آشیریلگنینی دعوا قیلگن.
بو جاري ییلده روسيه نینگ اوکراین پایتختیگه اویوشتیرگن ایکّینچی اېنگ ییریک هجوم حسابلنهدی.
اوشبو هجوم آرتیدن کییف شهری شهرداری اېرتهگه جمعه کونینی شهرده عمومي ماتم کونی دېب اعلان قیلگن.
