پاکستاننینگ بلوچستان ایالتیده یۉلاوچی بس تاغ درهسیگه قولهب توشیشی عاقبتیده کمیده ۴۰کیشی جان بېرگن ینه سکّیز کیشی آغیر یرهلنگن.
پاکستان محلي رسميلرینینگ معلوم قیلیشیچه، حادثه بوگون (جمعه، ۱۲-سرطان) اېرتهلب خیبر پختونخوا ایالتی چېگرهسی یقینیدهگی ژوب اداری ناحیهسی نینگ تاغلی «داناسر» منطقهسیده یوز بېرگن.
الجزیره تلویزیونی بلوچستان حکومتی مطبوعات کاتبی شاهد ریندگه تهیهنیب خبر بېریشیچه، اتوبوس کوېتهدن پېشاور تامان حرکتلنهیاتگن بۉلگن.
ریندنینگ ایتیشیچه، اتوبوس یوقاری تېزلیک سبب هیداوچی نظارتیدن چیقیب کېتیب، درهگه قولهگن.
اونینگ سۉزلریگه کۉره، اوشبو حادثهده کمیده ۴۰ کیشی هلاک بۉلگن، ینه سکّیز کیشی جراحت آلگن.
بلوچستان حکومتی مطبوعات سۉزلاوچیسی نینگ تأکیدلشیچه، قربانلر سانی نینگ کۉپلیگیگه سبب اتوبوس نهفقط اۉز یۉلاوچیلرینی، بلکه یۉلده بوزیلیب قالگن باشقه بیر اتوبوس نینگ اَیریم یۉلاوچیلرینی هم آلیب کېتهیاتگنی بۉلگن.
اونینگ ایتیشیچه، یۉلاوچیلر سانی نینگ معیاردن آرتیق بۉلگنی هم هلاکت یوز بېریشیگه تأثیر قیلگن بۉلیشی ممکن.
پاکستان جمهور رییسی آصف علی زرداري اوشبو فاجعه یوزهسیدن چوقور تأسف بیلدیریب، هلاک بۉلگنلر نینگ عایله اعضالریگه همدردلیک اظهار اېتدی.
او جراحتلنگنلرگه زودلیک بیلن طبي یاردم کۉرسهتیش و حادثهنی هر تامانلهمه تېکشیریشگه چقیردی.
بلوچستان و خیبر پختونخوادن قوتقروو گروهلری واقعه جاییگه یېتیب کېلگن بۉلیب، هلاک بۉلگنلر نینگ شخصینی انیقلش ایشلری دوام اېتماقده.
