ایراننینگ سابق رهبری علی خامنهای نینگ دفن مراسمینینگ بیرینچی کونی یکونلنهیاتگن بیر پیتده، مملکت نینگ عملدهگی رهبری مجتبی خامنهاي حلی هم اوشبو مراسمده اشتراک اېتمهدی.
ایران نینگ اوچ حاکمیت ترماغی رهبرلری جمهور رییس مسعود پزشکيان، پارلمان باشلیغی محمد باقیر قالیباف و قضاییه قوه باشلیغی محسن اژهای، شونینگدېک، قطار یوقاری مرتبهلی عملدارلر خامنهاي بیلن وداعلشوو مراسمیده قتنهشدی.
ایران یېتکرمهلرینینگ خبر بېریشیچه، قریب۱۰۰دولتدن دیپلوماتیک هیئتلر تهرانگه یېتیب کېلگن و علی خامنهاينینگ دفن مراسمیده اشتراک اېتماقده.
بیراق، بوگونگی کون دوامیده مجتبی خامنهاينینگ آتهسی جسدی یانیده کۉرینگنی یاکه یقین کونلرده بۉلیب اۉتهدیگن دفن مراسملریده قتنهشیشی حقیده حاضرچه هېچ قندهی معلومات یۉق.
ایران حکومتی بو بارهده رسماً هېچ قندهی بیانات بېرمهگن بۉلسه-ده، ایران رهبرینینگ هندستاندهگی نمایندهسی آیتالله حکیم الهي تیناوون «اندیا تودی» مخبریگه بېرگن صحبتیده، مجتبی خامنهاي خوفسیزلیک سببلریگه کۉره آتهسی نینگ دفن مراسمیده «عامهوي روشده» اشتراک اېتمسلیگینی ایتگن.
علی خامنهاي ۱۴۰۴-هجري قویاشي ییل نینگ ۹-حوت تانگیده، تخمیناً تۉرت آی اوّل، امریکا و اسرایل نینگ ایلک هجوملری چاغیده عایله اعضالری نینگ بیر قِسمی، جملهدن مجتبی خامهنهي نینگ تورموش اۉرتاغی بیلن بیرگه اۉلدیریلگن اېدی.
علی خامنهاي هلاک بۉلگنیدن سۉنگ، اونینگ اۉغلی مجتبی خامنهای مملکت نینگ ینگی رهبری اېتیب سیلنگن.
ایران نینگ اَیریم رسميلری مجتبی خامنهای امریکا و اسرایل هجوملری وقتیده یرهلنگنینی معلوم قیلگن.
شونگه قرهمهی، مجتبی خامنهای رهبر قرارگاهیگه اویوشتیریلگن هجومدن سۉنگ، یعنی آتهسی اۉلدیریلگن واقعهدن بېری جماعتچیلیک آلدیده کۉرینمهگن. شونینگدېک، حاضرگچه اونینگ آوازی، صورتی یاکه ویدېوسی هم نشر قیلینمهگن.
