ایران و امریکا اۉرتهسیدهگی نوبتدهگی تۉقنهشوولردن سۉنگ، ایران پارلمانی باشلیغی و مذاکرهچیلر هیئاتی رییسی محمدباقیر قالیباف بیر تمانلمه کېلیشوولر دوری یکونلنگنینی ایتدی.
قالیباف ایکس اجتماعي ترماغیده نشر قیلگن بیاناتیده امریکاگه مراجعت قیلیب شوندهی دېدی: «بیر تمانلمه کېلیشوولر دوری توگهدی. سیزگه وعدهلرینگیز و مجبوريتلرینگیزنی بجرینگ، عکس حالده بونینگ بدلینی تۉلهیسیز، دېب ایتگن اېدیک.»
او ینه: «اېندی حقیقتگه یوزلنیشینگیز کېرهک»، دېب قۉشیمچه قیلدی. ایران مذاکرهچیلر هیئاتیگه رهبرلیک قیلهیاتگن قالیباف «اسلام آباد شرطنامهسی» نینگ بېشینچی بندیدن بیر قِسمینی هم نشر قیلدی.
مذکور بندده هرمز بۉغازینی «اېران بېلگیلهگن ترتیبلر» اساسیده باشقریش ضرورلیگی تأکیدلنگن.
شو بیلن بیرگه، امریکا مدافعه وزیری پیت هگست مرکزي قوماندانلیک (سنتکام) نینگ ایرانگه اویوشتیریلگن ینگی هجوملر حقیدهگی بیاناتینی قَیته اولشیب، شوندهی یازدی: «ایران یامان تنلاو قیلدی، اېندی بونینگ بدلینی تۉلهشی کېرهک.»
امریکا مرکزي قوماندانلیگی (سنتکام) بوگون تانگده ایران حدودیدهگی 140 ته نشانگه ضربه بېرگنینی معلوم قیلدی. بونگه جوابن ایران قطر، بیرلشگن عرب امیرلیکلری، کویت، بحرین، اردن و عماندهگی امریکا حربي پایگاهلریگه درون و راکت هجوملرینی عملگه آشیرگنینی بیلدیردی.
حاضرگچه تامانلردن هېچ بیری انساني تلفاتلر حقیده رسمي معلومات نشر قیلمهگن.
بوگون تانگدهگی تۉقنهشوو ایراننینگ هرمز بۉغازیدن اۉتهیاتگن تجارت کېمهسیگه هجوم قیلگنیدن کېین باشلنگن. ایران اسلام انقلابی قۉریقچیلری (سپاه) بیاناتیگه کۉره، کېمه تصدیقلنمهگن یۉنهلیشده حرکتلنگن و رادارینی اۉچیریب قۉیگنی سببلی اوشبو سوو یۉلیدهگی کېمهلر حرکتیگه خوف توغدیرگن. شوندن سۉنگ، خودّی شوندهی سبب بیلن ایکّینچی تجارت کېمهسی هم نشانگه آلینیب، تۉختهتیلگن.
مذکور تۉقنهشوولردن کېین ایران هرمز بۉغازینی ینه یاپگنینی دعوا قیلماقده.
سپاه امریکانینگ تکراري هجوملری سببلی هرمز بۉغازی «کېینگی خبرگچه» یاپیق قالیشینی معلوم قیلگن.
