ایران اسلام انقلابی قۉریقچیلری امریکا قۉشمه ایالتلرینینگ بحرین، کویت و اردندهگی حربي پایگاهلریگه ینگی هجوملر اویوشتیریلگنینی معلوم قیلدی.
سپاه پاسداران بیاناتیده ایتیلیشیچه، بوگون (دوشنبه، ۲۲سرطان) تانگده امریکاگه قرشی عملیاتنینگ ایکّینچی باسقیچی دایرهسیده بحریندهگی شیخ عیسی پایگاهسیده جایلشگن تیک اوچرلرگه تخنیکي خدمت کۉرسهتیش مرکزی، پی-۸الکترون اوروش اوچاقی انگری همده اوچووچیسیز اوچیش اپاراتلری قوماندانلیک و باشقروو مرکزیگه ضربهلر بېریلگن.
سپاهنینگ ینه بیر بیاناتیده اردنهدهگی شهزاده حسن پرنس هوا پایگاهسی هم نشانگه آلینگنی قید اېتیلگن. سپاه نینگ دعواسیگه کۉره، بو پایگاهده امریکانینگ یاقیلغی انبارلری و پاتریوت هوا مدافعه تیزیمی نشانگه آلینگن.
شونینگدېک، سپاه کویتدهگی امریکا قۉشمه ایالتلری حربي پایگاهلریگه قرشی علی السالم و احمد الجابر پایگاهلری تامان راکتلر اوچیریلگنینی معلوم قیلدی.
اونگه کۉره، علی السالم پایگاهسیدهگی یاقیلغی انبارلری و پاتریوت هوا مدافعه تیزیمی، شونینگدېک احمد الجابر پایگاهسیدهگی استراتژیک افپیاس رادار تیزیمی تۉلیق یۉق قیلینگن.
کویت اوردوسی و بحرین ایچکی ایشلر وزیرلیگی ایکس اجتماعي ترماغیده نشر قیلگن بیاناتلریده هوا هجومی آژرلر ایشگه توشیریلگنی همده ایران تامانیدن اوچیریلگن راکت و درونلرگه قرشی هوا مدافعهسی تیزیملری ایشگه توشیریلگنینی بیلدیردی. اولر فقرالرنی باشپناهلرگه کیریشگه و خوفسیزلیک بۉییچه کۉرسهتمهلرگه عمل قیلیشگه چقیردی.
اردون اوردوسی هم دوشنبه کونی مملکت هوا حدودی اوزره ایران تامانیدن اوچیریلگن تۉرتته راکت اوریب توشیریلگنینی معلوم قیلدی.
اردن قوراللی کوچلری باش شتبیدهگی رسمي منبع نینگ بیلدیریشیچه، حادثه عاقبتیده جبرلنگنلر یاکه مادّي ضرر قید اېتیلمهگن. او شوندهی دېدی: «بوگون تانگده هوا مدافعهسی تیزیملری ایران حدودیدن اردن هوا حدودیگه کیرگن تۉرتته راکتنی توتیب، یۉق قیلدی.»
