ایران و امریکا اۉرتهسیدهگی ماجرا قَیته باشلنگنیگه قرهمهی، جهان بازاریده خام نفت نرخی پهسهیدی. بونگه سرمایه یاتقیزوچیلرنینگ هرمز بۉغازی بۉییچه دوام اېتهیاتگن مذاکرهلرنی بهالهیاتگنی سبب بۉلماقده.
رویترز خبریگه کۉره، بوگون گرینویچ وقتی بیلن ساعت۱۰:۳۴ده برنت مارکلی نفت نینگ بیر بشکهسی نرخی۱،۵۶ فایزگه پهسهییب،۸۹،۳۲دالرگه توشدی.
شونینگدېک، امریکا نینگ «وست تگزاس اینترمدیت» مارکلی نفتی هم۱،۳۵فایز ارزانلب، بیر بشکه۸۳،۳۲دالرگه یېتدی.
بوندن اوّل برنت نفتی نرخی۹۳،۳۱دالرگچه، «وست تگزاس اینترمدیت»اېسه۸۵،۹۴دالرگچه کۉتریلگن اېدی.
کپیتال اکونومیکس انستیتوتی اقلیم و خاماشیا بۉییچه اقتصادچیسی حماد حسین رویترزگه بېرگن صحبتیده: «عماننینگ ایران بیلن مذاکرهلر آلیب بارهیاتگنی هرمز بۉغازینی قَیته آچیش یۉلیده معین سیلجیش بۉلیشی ممکنلیگینی انگلهتهدی»، دېدی.
حاضرده ایران و عمان هرمز بۉغازینی باشقریش مسألهسیده مذاکره آلیب بارماقده، بیراق حاضرچه هېچ قندهی کېلیشووگه اېریشیلمهگن.
سۉنگگی کونلرده عمان ایرانگه هرمز بۉغازینی باشقریش بۉییچه قۉشمه منطقوي میکانیزم یرهتیشنی تکلیف قیلگن. تکلیفگه کۉره، بۉغازدن اۉتووچی کېمهلر اختیاري روشده تۉلاو قیلهدی، اما بۉغاز نظارتی فقط ایران قۉلیده بۉلمهیدی.
رویترز فارس کۉرفزی منطقهسیدهگی منبعلریگه تهیهنیب، اوشبو رېجه منطقه دولتلری تامانیدن قۉللب-قوّتلنهیاتگنینی و او مالاکا بۉغازی تجربهسی اساسیده ایشلب چیقیلگنینی معلوم قیلگن. مالاکا بۉغازیده ملهیزيه، اندونیزیالیکيه و سنگاپور کېمهلردن دایمي باج اېمس، بلکه کۉرسهتیلگن خدمتلر اوچون حق آلهدی.
ایران تشقی ایشلر وزیری اۉرینباسری کاظم غریبآبادی ایران تلویزیونیگه بیرگن صحبتیده، عمان تکلیفی ایران نینگ خوفسیزلیک بارهسیدهگی خواطرلرینی برطرف اېته آلمهگنینی و شو سببلی رد اېتیلگنینی ایتدی.
اونینگ تأکیدلشیچه، ایران نینگ تکلیفی شوندن عبارتکی، «بۉغاز نینگ بیر یۉلهگی تۉلیق ایران نظارتیده بۉلیشی، ایکّینچی یۉلک نینگ بیر قِسمی هم ایران اختیاریده قالیشی کېرهک. بو قطعي موضع بۉلیب، ایران باشقه هېچ قندهی فورمولنی قبول قیلمهیدی».
ایران امریکا بیلن ماجرا قَیته باشلنگنیدن سۉنگ هرمز بۉغازینی ینه تجارت و نفت تانکېرلریگه یاپدی همده ایران بېلگیلهگن یۉنهلیشدن تشقریده حرکتلنگن بیر نېچه کېمهگه هجوم قیلگن.
جهان خام نفتی و سویولتیریلگن گازی نینگ قریب۲۰فایزی هرمز بۉغازی آرقهلی تشیلهدی. اوشبو سوو یۉلینینگ یاپیلیشی آرتیدن نفت نرخلری کېسکین آشگن و اۉتگن هفته بیر بشکه نفت نرخی۱۰۰ دالردن هم آشگن اېدی.
