ایران تشقی ایشلر وزیری عباس عراقچی سعوديه عربستانی تشقی ایشلر وزیری فیصل بن فرحان بیلن تیلفون آرقهلی ملاقات قیلیب، منطقهدهگی کېسکینلیکنی کمهیتیریش مسألهلرینی محاکمه قیلدی.
ایران نینگ ایرنا اخبارات آژانسی خبریگه کۉره، عراقچی و فیصل بن فرحان یکشنبه آقشامی (۱۱-اسد) دیپلوماتیک سعی-حرکتلر آرقهلی منطقهدهگی ترنگلیکنی پسهیتیریش یۉللری یوزهسیدن فکر المشگن.
خبرگه کۉره، فیصل بن فرحان سعوديه عربستانی نینگ منطقهده خوفسیزلیک و برقرارلیکنی مستحکملشدهگی رۉلینی دوام اېتتیریشگه صادقلیگینی تأکیدلب، مملکتی منطقهدهگی برچه دولتلر و خلقلرنینگ عمومي منفعتلری تأمینلنیشینی قۉللب-قوّتلشینی بیلدیرگن.
سعوديه عربستانی نینگ (واس) خبرگزارلیگی هم فیصل بن فرحان عراقچیدن تشقری قطر و اردن تشقی ایشلر وزیرلری بیلن هم تیلفون آرقهلی ملاقات قیلگنینی معلوم قیلدی.
عینِ پیتده امریکا جمهور رییسی دونالد ترامپ منطقه دولتلری و ایران اَیریم مسألهلر بۉییچه اۉز ارا کېلیشووگه اېریشگنینی معلوم قیلدی.
ترامپ ژورنالیستلرگه سعوديه عربیستانی، قطر، بیرلشگن عرب امیرلیکلری و ایران وکیللری او بیلن باغلنیب، هرمز بۉغازی مسألهسیده کېلیشوو موجودلیگینی بیلدیرگنینی ایتدی. اونینگ سۉزلریگه کۉره، شو سببلی اوّلدن رېجهلشتیریلگن حربي هجوم بېکار قیلینگن و دوشنبه کونی مذاکرهلر باشلنیشی رېجهلشتیریلگن. ترامپ، شونینگدېک، ایران هسته دستورینی توگهتیش بۉییچه هم کېلیشووگه اېریشیش امکانیتی بارلیگینی تأکیدلهدی.
