ایران جمهور رییسی مسعود پزشکيان مملکتی اوروشنی کېنگهیتیریشنی ایستهمسلیگینی، بیراق اۉز چېگرهلری و منفعتلرینی حمایه قیلیشینی ایتدی.
ایران عامهوي اخبارات واسطهلری بوگون (سهشنبه، ۱۳ اسد) اونینگ رسمي ییغیلیشدهگی نطقیدن پرچهلرنی اعلان قیلدی.
پزشکياننینگ تأکیدلشیچه، ایران اۉز حدودی و منفعتلرینی حمایه قیلهدی، اما اوروشنی کېنگهیتیریش نیتیده اېمس.
اونینگ ایتیشیچه، ماجرا «اَیریم شخصلرنینگ فتنهسی و زۉرآورلیگی» عاقبتیده یوزهگه کېلگن. اولر اۉز چېگرهلری بیلن قناعتلنمهیپتی.
ایران جمهور رییسی شوندهی دېدی: «بیز اوروشنی دوام اېتتیریش طرفداری اېمسمیز. بیراق شوندهی جمعیت برپا اېتیشیمیز کېرهککی، دشمن اونگه کۉز آلهیتیره آلمهسین، کیریب کېله آلمهسین و بو اجتماعي بیرلیکنی پرچهلب یوباره آلمهسین.»
بو بیانات سۉنگگی بیر نېچه کون ایچیده ایران و امریکا اۉرتهسیدهگی تۉقنهشوولر تۉختهگن بیر پیتده ینگرهدی.
امریکا جمهور رییسی دونالد ترامپ نینگ ایتیشیچه، حاضرده هرمز بۉغازینی قَیته آچیش و ایران نینگ هسته دستوری بۉییچه مذاکرهلر دوام اېتماقده.
بیراق ایران تشقی ایشلر وزیرلیگی مطبوعات سۉزلاوچیسی اسماعیل بقايی امریکا بیلن مذاکرهلر آلیب باریلهیاتگنینی رد اېتیب، ایران هېچ قندهی هیئتنی قبول قیلمهیاتگنی و مذاکرهلر اوچون وکیللر یوباریش رېجهسیگه اېگه اېمسلیگینی بیلدیردی.
بو اېسه دونالد ترامپ نینگ کېسکین مناسبتیگه سبب بۉلدی. او ایران رهبرلرینی «نهایتده ایکّی یوزلمهچی» دېب اتهب، اولر یشیرین روشده مذاکرهلر اۉتکزیشنی سۉرهیاتگنی، اما آچیقچهسیگه دوام اېتهیاتگن مذاکرهلرنی انکار اېتهیاتگنینی دعوا قیلدی.
