تایلند پولیسی مملکت نینگ «نونتابوری» ولایتیدهگی مکتبلردن بیریده اۉقووچی تامانیدن صادر اېتیلگن آتیشمه عاقبتیده بیر نفر اۉقیتووچی جان بېرگن، ینه تۉرت کیشی یرهلنگنینی معلوم قیلدی.
رویترز خبریگه کۉره، تایلند نینگ «نونتابوری» ولایتی پولیس باشلیغی اوشبو آتیشمه بوگون (جمعه، ۱۶-اسد) «بانک کروای» اولسواللیگیده صادر بۉلگنینی، هجومنی صادر اېتگن اۉقووچی اېسه واقعهدن سۉنگ اۉز جانیگه قصد قیلگنینی بیلدیرگن.
پولیس معلوماتیگه کۉره، یرهدارلر آرهسیده بیر اۉقیتووچی و اوچ اۉقووچی بار.
۱۸ یاشلی اۉقووچیلردن بیری رویترز خبرگزارلیگیگه شوندهی دېگن: «اوّلیگه بو قورال آوازی دېب اۉیلهمهدیم. کېتمه-کېت جوده کۉپ اۉق آوازلری اېشیتیلدی: «بنگ، بنگ، بنگ.» کېین جیم بۉلدی. سۉنگ ینه باشلندی.»
رویترز خبریگه کۉره، آتیشمه صادر بۉلگن مکتبده ۲۰۰۵-ییلده اوچ مینگ۱۰۰ نفر اۉقووچی و۱۴۷نفر اۉقیتووچی بۉلگن.
حاضرچه اوشبو آتیشمه نینگ سببی انیقلنمهگن. بوندن اوّل هم تایلند مکتبلریده قوراللی آتیشمه حالتلری قید اېتیلگن.
جاري ییل فبروری آییده مملکت جَنوبیدهگی «هات یای» تومنیدهگی مکتبده یوز بېرگن آتیشمهده بیر کیشی هلاک بۉلگن، ینه بیر کیشی یرهلنگن.
