یمندهگی حوثيلر سعوديه عربستانی، تورکيه و پاکستان اۉرتهسیده مدافعه شرطنامهسی امضالنگنیدن ایکّی کون اۉتیب، سعوديهنینگ جازان شهریدهگی آرامکو نفتنی قَیته ایشلش فابریکهسیگه درون هجومی اویوشتیرگنینی معلوم قیلدی.
رویترز خبریگه کۉره، حوثيلر حربي سۉزلاوچیسی یحیی سریع بوگون (یکشنبه، ۱۸-اسد) اوشبو نفتنی قَیته ایشلش فابریکهسیگه اوچووچیسیز اوچیش اپاراتی آرقهلی نشانگه آلینگنینی بیلدیرگن.
سعوديه انرژی وزیرلیگی بوگون اېرتهلب مذکور فابریکهده یوز بېرگن یانغین تۉلیق اۉچیریلگنینی معلوم قیلگن، بیراق یانغیننینگ سببیگه ایضاح بېرمهگن. وزیرلیک حادثه عاقبتیده قربانلر یاکه جراحتلنگنلر یۉقلیگینی و واقعه یوزهسیدن تېکشیروو دوام اېتهیاتگنینی بیلدیرگن.
جازان نفتنی قَیته ایشلش فابریکه سعوديه عربستانی نینگ جَنوبی-غربیده، قیزیل دېنگیز ساحلیده و یمن چېگرهسی یقینیده جایلشگن بۉلیب، کونیگه 400 مینگ بشکه خام نفتنی قَیته ایشلش قوّتیگه اېگه.
ایران تامانیدن قۉللب-قوّتلنهیاتگن حوثيلر اوّل هم جازان و ینبع حدودلریدهگی آرامکو تاسیساتلریگه هجوملر اویوشتیرگن اېدی.
شونینگدېک، اولر سعوديه عربستانیگه قرشی دېنگیز قملینی اعلان قیلگن همده قیزیل دېنگیز و بابالمندب بۉغازیده سعوديهگه تېگیشلی اَیریم کېمهلرگه هجوم قیلگن.
حوثيلر نینگ سعوديه عربستانیگه قرشی هجوملری منطقهدهگی کېسکینلیکنی ینه-ده کوچهیتیریب، انرژی تامیناتیگه سلبي تاثیر کۉرسهتماقده همده جهان اقتصادی یوزهسیدن خواطرلرنی آشیرماقده.
