سوريه مؤقت حکومتی محکمهسی سهشنبه کونی مملکت نینگ حاکمیتدن چېتلهتیلگن سابق جمهور رییسی بشار اسدنی سیرتدن اۉتکزیلگن محکمه جریانیده اۉلیم جزاسیگه حکم قیلدی.
رویترز خبریگه کۉره، محکمه بشار اسدنی سوريه ایچکی اوروشی دوریده قاتللیک، قییناقلر، اۉزباشیمچهلیک بیلن حبسگه آلیش و انسانیتگه قرشی جنایتلرنی صادر اېتیشده عیبدار دېب تاپدی.
اوشبو ایش بۉییچه اسد حکومتی نینگ خوفسیزلیک عملدارلریدن بیری عاطف نجیب هم اۉلیم جزاسیگه حکم قیلیندی.
بو بشر اسد حاکمیتدن اغدریلگنیدن بېری اونگه نسبتاً چیقریلگن ایلک محکمه حکمی دیر.
اسدگه قرشی قوراللی مخالف کوچلر ۲۰۲۴-ییل دسامبر آییده کېنگ کۉلملی هجوم اویوشتیریب، اسدلر عایلهسی نینگ بیر نېچه اۉن ییللیک حکمرانلیگیگه یکون یهسهگن اېدی.
مخالف کوچلر دَمهشققه کیریب کېلیشی عرفهسیده بشر اسد پایتختنی ترک اېتدی و حاضرده روسيه پایتختی مسکوهده یشهماقده.
بشار اسد ۲۰۰۰-ییلده آتهسی حافظ اسد وفاتیدن سۉنگ سوريه جمهور رییسی لوازمینی اېگهلهگن اېدی. او ییگیرمه ییلدن آرتیق وقت دوامیده عایلهوي حاکمیتنی سقلب قالدی همده سوريهده اهالی نینگ کۉپچیلیگی سنّیلردن عبارت بۉلیشیگه قرهمهی، علوی آزچیلیگی نینگ حکمران موقعینی دوام اېتتیردی.
بشار اسد دوریده سوريه ایران نینگ یقین اتفاقچیلریدن بیری بۉلیب، اسرایل و امریکاگه قرشی سیاست یوریتدی.
سوريه ایچکی اوروشی ۲۰۱۱-ییلده عرب بهاری دایرهسیدهگی ناراضیلیک نمایشلری و خلق نینگ دموکراسی طلبلریدن سۉنگ باشلندی. نمایشلر نینگ قانلی باستیریلیشی اېسه ماجرا نینگ اوزاق دوام اېتگن ایچکی اوروشیگه ایلنیشیگه سبب بۉلدی.
