قاچقینلر اوچون خلق ارا حقوقي یاردم و حمایه تشکیلاتی امریکا افغانستانده امریکا ماموریتی اوچون حیاتینی خوف آستیگه قۉیگن افغانستان فقرالریگه یوز اۉگیرگنینی بیلدیردی.
تشکیلات سهشنبه کونی (۲۱-اسد) جمهوریت توزومی قولهگنی، طالبان نینگ ینه حاکمیتگه کېلگنی و امریکا قۉشینلری نینگ افغانستاندن چیقیب کېتگنینینگ بېش ییللیگی مناسبتی بیلن اعلان قیلگن بیاناتیده ترامپ مأموریتی نینگ افغانستانلیک باشپناه ایزلاوچیلرگه قۉیگن چېکلاولرینی تنقید قیلدی.
تشکیلات شوندهی دېدی: «امریکا حکومتی تاباره کۉپراق افغانستان قاچقینلریدن، جملهدن افغانستانده امریکا ماموریتینی قۉللب-قوّتلش اوچون اۉز حیاتینی خوف آستیگه قۉیگن شخصلردن یوز اۉگیرماقده.»
قاچقینلر اوچون خلقارا حقوقي یاردم و حمایه تشکیلاتی (آیآرایپی) نینگ ایتیشیچه، مخصوص مهاجرتی ویزه (اسآیوی) بېریلیشیدهگی کۉپ ییللیک کېچیکیشلر امریکا نینگ افغانستاندهگی کۉپلب اتفاقچیلرینی هنوز خوف آستیده قالدیرماقده.
مذکور تشکیلات ینگی چېکلاولر اولرنینگ خوفسیزلیککه یېتیب باریشیگه تۉسقینلیک قیلهیاتگنینی قۉشیمچه قیلدی.
(آیآرایپی) حقوقي خدمتلری مدیری نینگ اۉرینباسری جنیفر پاتوتا شوندهی دېدی: «ترامپ مأموریتی افغان فقرالری نینگ اقشگه کیریشینی تعقیقلب تورگن بیر پیتده، عینِ وقتده اوشبو یۉللرگه تهیهنگن و امریکاده اۉز حیاتینی قورگن افغانستان جماعهلرینی فعال روشده پرچهلهماقده. یشیل کارت اېگهلری اۉزباشیمچهلیک بیلن نشانگه آلینهدیمی یاکه امریکا نینگ خارجدهگی اتفاقچیلری سرسان قیلینهدیمی، امریکا حکومتی کانگرسگه افغانستان قاچقینلرینی حمایه قیلیش بۉییچه بېرگن وعدهسیگه خیانت قیلدی.»
2025-ییل آخریدن باشلب، افغانستان فقرالری اوچون سفر تعقیقی و مهاجرت ویزهلر بېریلیشی تۉختهتیلگنیدن کېین، حتا امریکا نینگ مخصوص مهاجرتی ویزهسیگه(اسآیوی) حقلی بۉلگن شخصلرنینگ هم مملکتگه کیریشیگه یۉل قۉییلمهیپتی.
(آیآرایپی) امریکا حکومتینی کمسیتووچی سیاستده عیبلب، ترامپ مأموریتی باشپناه ایزلاوچیلرنی قبول قیلیشنی فقط «آق تنلی افریقالیکلر» بیلن چېکلهگنینی و 2026-مالیه ییلیده اتیگی اوچ نفر افغانستان فقراسینی جایلشتیرگنینی بیلدیردی.
تشکیلات نهفقط امریکا بیلن همکارلیک قیلگن افغانلرنینگ مملکتگه کیریشیگه تۉسقینلیک قیلینهیاتگنی، بو نینگ عاقبتیده افغانستان و قۉشنی مملکتلردهگی سابق امریکالیک همکارلر نینگ حیاتی خوف آستیده قالهیاتگنینی، بلکه امریکا حدودیدهگی افغان باشپناه ایزلاوچیلرگه نسبتاً مناسبتنی هم تنقید قیلدی.
(آیآرایپی) بیاناتیده ایتیلیشیچه، امریکا ایچکریسیده هم افغانستان باشپناه ایزلاوچیلری حبسگه آلینماقده، اولرنینگ قانوني مقامی بېکار قیلینماقده و اولر دېپورت قیلینیش خوفی آستیده قالماقده.
بو دونالد ترامپ 2025-ییل باشیده آق اویگه قَیتگچ، افغانستاننی هم اۉز ایچیگه آلگن بیر قطار دولتلر فقرالری نینگ امریکاگه کیریشینی تعقیقلش تۉغریسیده فرمان چیقرگنیدن کېینگی وضعیت یوز بېرماقده.
او، شونینگدېک، اَیریم دولتلر، جملهدن افغانستان فقرالریگه مهاجرت، محصللیک و سیاحلیک ویزهلرینی بېریش جریانینی هم بېکار قیلگن.
ترامپ فرمانیگه کۉره، 2001–2021-ییللر آرهلیغیده اقش اوردوسی و امریکا تشکیلاتلری بیلن همکارلیک قیلگنی سببلی طالبان قصاصیدن خوف آستیده بۉلگن مینگلب شخصلر هنوز افغانستان و منطقه نینگ اَیریم مملکتلریده مخصوص ایممیگرهتسیان ویزه (اسآیوی) کوتماقده.
شو بیلن بیرگه، یقینده اقش سودی باشپناه مقامیگه اېگه شخصلر افغانستاندهگی عایله اعضالرینی اقشگه تکلیف قیلیشی ممکنلیگی حقیده حکم چیقردی. بیراق افغانستان فقرالری نینگ اقشگه سفریگه عاید باشقه تعقیقلر همان اۉز کوچیده قالماقده.
