پاکستان طبیات فنلری انستیتوتیگه (پیآیاماس) قرهشلی اسلام آباددهگی «آنه و باله» شفاخانهسی نینگ بالهلر بۉلیمیده یانغین صادر بۉلیشی عاقبتیده۱۴ نفر چقهلاق هلاک بۉلدی.
اکسپرس تریبون، نشرینینگ خبر بېریشیچه، یانغین بوگون (چهارشنبه، ۴-سنبله) اېرتهلب شفاخانهنینگ اوچینچی قبتیدهگی چقهلاقلر سقلنهدیگن بۉلیمده صادر بۉلگن.
پایتخت فوق العاده خدمتلر تشکیلاتی و اسلام آباد ترقیات ریاستینینگ یانغین خوفسیزلیگی بۉلیمی یانغین اۉچیرووچیلر تامانیدن برطرف اېتیلگنینی معلوم قیلگن.
پایتخت ترقیات ریاستی معلوماتیگه کۉره، یانغین حقیدهگی خبر اېرتهلب ساعت۶:۴۵اطرافیده کېلیب توشگن و یانغین اۉچیریش همده قوتقروو خادملری یېتّی دقیقه ایچیده واقعه جاییگه یېتیب کېلگن.
اسلام آباد محلي مأموریتی اوشبو حادثهده۱۴ نفر باله آغیر کویگنینی و کېینچهلیک وفات اېتگنینی معلوم قیلگن.
پاکستان ساغلیقنی سقلش وزیری مصطفی کمالنینگ ایتیشیچه، یانغین بالهلر مخصوص مراقبتلر بۉلیمیده هوا تهویه دستگاهی پارتلشی آرتیدن باشلنگن. اونینگ سۉزلریگه کۉره، اوشبو بۉلیمده آکسجن موجود بۉلگنی یانغین نینگ کوچهییشیگه سبب بۉلگن.
او: «نتیجهده۱۴ نفر بېگناه باله حیاتدن کۉز یومدی»، – دېدی.
پاکستان ساغلیقنی سقلش وزیری واقعه سببلرینی انیقلش و اونینگ تفصیلاتلرینی اۉرگنیش اوچون مسوول ادارهلر وکیللری واقعه جاییگه یوباریلگنینی قۉشیمچه قیلدی.
شو بیلن بیرگه، اسلام آباد محلي مأموریتی یانغین نینگ انیق سببلرینی و اونینگ ترقهلیشیگه تأثیر قیلگن عامللرنی اۉرگنیش اوچون مخصوص تېرگاو کمیسیونسینی توزگن.
مذکور کمیسیونگه، شونینگدېک، یانغینگه قرشی خوفسیزلیک چارهلری نینگ حالتی، قوتقروو خادملرینینگ یېتیب کېلیش وقتی همده قوتقروو و یانغین اۉچیریش عملیاتلری نینگ ثمرهدارلیگینی بهالش و۲۴ ساعت ایچیده حسابات تقدیم اېتیش وظیفهسی یوکلهتیلگن.
پاکستان باش وزیری شهباز شریف هم اوشبو حادثه یوزهسیدن زودلیک بیلن تېرگاو اۉتکزیش بۉییچه کۉرسهتمه بېرگن.
باش وزیر شریف: «بالهلر قربان بۉلگن بوندهی حادثه نینگ اۉرنینی قاپلب بۉلمهیدی. اوشبو واقعه بیلن باغلیق برچه شرایط و عامللر تۉلیق اۉرگنیلیشی، مسووللر انیقلنیشی و اولرگه نسبتاً اېنگ قطعي چارهلر کۉریلیشی کېرهک»، – دېدی.
شهباز شریف، شونینگدېک، هلاک بۉلگن چقهلاقلرنینگ عایلهلریگه همدردلیک بیلدیریب، تعزیه اظهار قیلگن.
