نیپال رسميلری مملکتده سوو تاشقینلری عاقبتیده جان بېرگنلر سانی۹۵نفرگه یېتگنینی، قریب۴۰۰ کیشی، جملهدن خارجي سیاحلر اېسه بېدرَک یۉقالگنینی معلوم قیلدی.
نیپال پولیسی مطبوعات سۉزلاوچیسی «ابی نارایان کافله» فرانسه اخبارات آژانسیگه بېرگن صحبتیده حاضرگچه اوشبو سوو تاشقینی عاقبتیده۹۵ کیشینینگ هلاک بۉلگنی حقیده خبرلر کېلیب توشگنینی ایتدی.
شو بیلن بیرگه، رویترز نیپال توریزم وزیرلیگیگه تهیهنیب، سوو تاشقینی عاقبتیده کمیده۳۴۱نفر خارجي آدملر بېدرَک یۉقالگنینی خبر قیلدی.
نیپال پولیسی مطبوعات سۉزلاوچیسینینگ ایتیشیچه، بېدرَک یۉقالگنلر آرهسیده۲۸ نفر پولیس خادیمی هم بار.
نیپال توریزم کېنگشی باشلیغی «حکمت سینگ آیر» اېسه بیبیسیگه بېرگن صحبتیده بېدرَک یۉقالگنلر آرهسیده۱۰۰ نفردن آرتیق هندستانلیک،۱۷ کیشی مالزیالیک،۱۲ کیشی بریتانيالیک، تۉرت نفر جَنوبي افریقالیک، شونینگدېک، امریکا، آسترلیا و هالند وطنداشلری بارلیگینی ایتدی.
اوشبو خبرگه کۉره، اولرنینگ اکثریتی تبتدهگی طبيعي و مذهبی سیاحلیک مسکنی «کایلاش مانسرووار» گه یۉل آلگن بۉلگن.
نیپال پولیسی اوّلراق مملکتنینگ چین بیلن چېگرهداش حدودلریده کېنگ کۉلملی سوو تاشقینلری یوزهگه کېلیشی عاقبتیده کمیده سکّیز کیشی هلاک بۉلگنینی معلوم قیلگن اېدی.
نیپال پولیسی و اجتماعي ترماق فایدهلنووچیلری تامانیدن ترقهتیلگن ویدیولرده چین چېگرهسی یقینیدهگی هیمالیا تاغلری واديلریده کوچلی لایقه سوو آقیملری عکس اېتگن.
سوو تاشقینی نیپال و چین چېگرهسیدهگی تبت خودمختار حدودینینگ «گیرونک» بندریده یوز بېرگن. بو حدود ییلنینگ عینِ موسمیده محلي و خارجي سیاحلر کۉپ تشریف بویورهدیگن جایلردن بیریدیر.
سوو تاشقینیدن ضرر کۉرگن یۉل، شونینگدېک، سیاحلر پیاده سیاحت قیلهدیگن لانگتانگ ملي باغی و تاغلر آرهسیده جایلشگن مقّدس کۉل گوسایکونداگه آلیب بارووچی اساسي یۉللردن بیریدیر. آدملر اوشبو کۉلگه زیارت قیلیش اوچون تشریف بویورهدیلر.
خلقارا عامهوي اخبارات واسطهلری سوو تاشقینیدن ضرر کۉرگن حدودلرده قوتقروو ایشلری دوام اېتهیاتگنینی و قربانلر سانی ینه-ده آشیشی ممکنلیگینی خبر قیلگن.
