عامهوي اخبارات واسطهلری روسيهنینگ اوکراین پایتختی کییف شهریگه اویوشتیرگن درون هجوملریده کمیده۳۷ کیشی هلاک بۉلگنینی خبر قیلماقده.
رویترز خبریگه کۉره، هجوملر کېچه تونده کییف شهرینینگ «مایلا» حدودیدهگی بیر انبار و شهرنینگ باشقه نقطهلریگه اویوشتیریلگن.
اوکراین جمهور رییسی والادیمیر زلنسکي «مایلا» دهگی انبارگه قیلینگن هجومنی تصدیقلب، اوشبو هجومده۲۶کیشی هلاک بۉلگنی و ینه اۉنلب آدم یرهلنگنینی ایتگن.
اوکراین جمهور رییسینینگ سۉزلریگه کۉره، هجوم یانغین و ایکّیلمچی پارتلشگه سبب بۉلگن همده اطرافدهگی تاسیساتگه هم کتّه ضرر یېتکزگن.
او اویلر و اهالی یشهیدیگن حدودلر یقینیده اۉق-داریلر سقلنیشی یاکه تشیلیشیدن ناراضیلیگینی بیلدیریب، بو بارهده بېپروالیککه یۉل قۉیگن منصبدارلر جزالنیشینی ایتگن.
زلنسکي، شونینگدېک، روسيهنینگ اوکراینگه قرشی هجوملری تون دوامیده هم دوام اېتگنینی و اودسا، دنیپرو، کییف، زاپوریژژیا، سومی، خرسون، خارکف، میکولائیف، دونتسک و چرنیهیف ولایتلری نشانگه آلینگنینی بیلدیرگن.
رویترز خبریگه کۉره، اوکرایننینگ پایتختی کییفنینگ باشقه حدودلریگه اویوشتیریلگن هجوملرده هم بیر نېچه کیشی، جملهدن،۱۴ یاشلی قیز و۱۲ یاشلی قیز هلاک بۉلگن.
اوشبو نشرنینگ خبر بېریشیچه، روسيه کېتمه-کېت اوچینچی تون دوامیده اوکراین پایتختینی کۉپلب درون هجوملری بیلن نشانگه آلگن و شهرگه قرشی ینگی هجوم کمپاین باشلهگن.
