طالبلرنینگ تشقی ایشلر وزیرلیگی پاکستاننینگ کابلدهگی مؤقت اېلچیسینی چقیریب، اونگه پاکستان اوردوسی تامانیدن افغانستان هوا حدودی نینگ «بوزیلیشی و کنر همده پکتیکا ولایتلریدهگی حدودلر و تینچ اهالی تاسیساتیگه هوا هجوملری اویوشتیریلگنی» یوزهسیدن ناراضیلیک اعتراضنامهسینی تاپشیرگنینی معلوم قیلدی.
اوشبو وزیرلیک بوگون کېچقورون (دوشنبه، ۳۰-سنبله) بیانات بېریب، طالبان اوشبو هجوملرنی «افغانستان ملي حاکمیتینی و توپراق یخلیتلیگی نینگ آچیقدن-آچیق بوزیلیشی» دېب حسابلشینی و اولرنی قطعي قارهلشینی ایتدی.
طالبلر تشقی ایشلر وزیرلیگی شونینگدېک، پاکستاندهگی سۉنگگی خوفسیزلیک حادثهلری افغانستان حدودیدن کېلیب چیققنی حقیدهگی دعوالرنی هم بو گروه قطعا رد اېتیشینی بیلدیردی.
وزیرلیک طالبلر «بوندهی اساسسیز دعوالرنی ایلگری سوریش و اولر اساسیده حربي حرکتلرنی آقلش حقیقتنی بوزیب کۉرسهتیش و جماعتچیلیک فکرینی چلغیتیشگه اورینیش» دېب حسابلشینی ایتدی.
طالبلر تشقی ایشلر وزیرلیگی پاکستان باشقه دولتلرنی عیبلش و ایچکی معمالرینی تشقی عامللرگه باغلش اۉرنیگه، اۉزینینگ خوفسیزلیک و سیاسي معمالرینینگ حقیقي سببلرینی انیقلش و اولرنی حل اېتیشگه اعتبار قرهتیشی کېرهکلیگینی بیلدیردی.
پاکستان بوگون تانگده افغانستاننینگ کنر و پکتیکا ولایتلریدهگی نشانلرنی بامباردمان قیلدی.
طالبلر بو هجوملرده «تینچ اهالی حدودلری» نشانگه آلینگنینی و اوچ کیشی هلاک بۉلیب، ینه تۉرت کیشی یرهلنگنینی معلوم قیلدی.
طالبلر مطبوعات سوزلاوچیسی ذبیحالله مجاهد بو گروه هجوملریگه «مناسب جواب» بېریشینی ایتدی.
بیراق پاکستان اخبارات و نشرلر وزیرلیگی مملکت «تیتیپی و اونگه علاقهدار گروهلر نینگ بازهلری و یشیرینیش جایلری»نی نشانگه آلگنینی همده هجوملرده بیر قطار خودکوش-ترورچیلرنی اۉز ایچیگه آلگن ۲۸ نفر «ترورچی» اۉلدیریلگنینی معلوم قیلدی.
پاکستان بو هجوملرنی خیبر پختونخوا ایالتینینگ کوهات اولسواللیگیدهگی پولیس مجموعهسیگه اویوشتیریلگن هجوم آرتیدن عملگه آشیردی. مذکور هجوم اوچون پاکستان طالبانینینگ سابق قوماندانلریدن بیری حافظ گُل بهادر باشچیلیگیدهگی «اتحاد المجاهدین» گروهی جوابگرلیکنی اۉز ذمّهسیگه آلگن.
