محلی منبعلر طالبلر استخبارات کوچلری کابل شهرینینگ غربي قِسمیدهگی «خاتم الانبیا» دیني مدرسهسیگه باستیریب کیریب، اونی یاپگنینی معلوم قیلدی.
منبعلرگه کۉره، طالبلر کوچلری بوگون (دوشنبه، ۳۰-سنبله) ساعت تخمیناً ۱۰:۰۰ ده اوشبو دیني مدرسهنی قورشهب آلیب، طلبهلر و مسووللرینی چیقریب یوبارگن. شوندن سۉنگ مدرسه بناسی، «شهید مزارینینگ کتّه مصلاسی» و اونینگ اداری بۉلیملرینی تۉلیق «مُهرلب»، یاپیب قۉیگن.
منبعلر خبریگه کۉره، طالبان «خاتم الانبیا» مدرسهسی مسوولی سیدحست فاضلزاده و اوشبو مدرسه اۉقیتووچیلرینی هم حبسگه آلیب، اۉزلری بیلن آلیب کېتگن.
«خاتم الانبیا» دیني مدرسهسی کابلنینگ غربي قِسمیدهگی «مدرسه» بېکتیده جایلشگن. طالبان تامانیدن تشکیل اېتیلگن «کۉچمنچیلر و قیشلاق اهالیسی اۉرتهسیدهگی نزاعلرنی حل قیلیش کمیسیونی» هم شو جایده فعالیت یوریتردی.
حاضرچه طالبلر اوشبو کمیسیون ادارهسینی هم یاپگن یاکه یاپمهگنیگه انیقلیک کیریتیلمهگن.
طالبلد بوندن بیر نېچه کون اوّل کابلدهگی «خاتم النبیین» دیني حوزهسینی هم قورشهب آلیب، کېینچهلیک اونی بۉشهتگن اېدی. اوشبو دیني مرکز افغانستاندهگی شیعهلرگه تېگیشلی اېنگ ییریک دیني تعلیم مسکنی اېدی.
طالبلر نینگ شیعهلرگه قرشی سۉنگگی چارهلری کېنگ کۉلملی ناراضیلیکلرگه سبب بۉلگن و اوشبو گروه حکمرانلیگی آستیده هزارهلر همده شیعهلر نینگ احوالی یوزهسیدن جدّي خواطرلرنی کوچهیتیرگن.
