ایرلندنینگ تشقی ایشلر و تجارت وزیری هلن مکانتی افغانستان عیاللریگه قرشی طالبلر تامانیدن چیقریلهیاتگن فرمانلردن فقط غضبلنیش نینگ اۉزی یېترلی اېمسلیگینی، بونگه قرشی عملي چارهلر کۉریش کېرهکلیگینی ایتدی.
ایرلند تشقی ایشلر وزیری بوگون کېچقورون نیویورکده افغانستان عیاللرینینگ احوالیگه بغیشلنگن ییغیلیشده سۉزلر اېکن، شوندهی دېدی: «هر سفر ینگی فرمان چیقریلگنی و عیاللرنینگ ینه بیر حقوقی تارتیب آلینگنینی کۉرگنیمیزده، بیز بوندن حقیقتاً هم دهشتگه توشهمیز و غضبلنهمیز. اما شونچهکه دهشتگه توشیش و غضبلنیش نینگ اۉزی یېترلی اېمس».
اونینگ ایتیشیچه، افغانستاندن تشقریده بۉلگن برچهمیز بو وضعیتگه عملي چارهلر بیلن جواب بېریشیمیز کېرهک.
مک انتی شونینگدېک، طالبلر حکومتی هېچ قندهی شکلده تن آلینمسلیگی یاکه او بیلن مناسبتلر عادتي حالگه کېلتیریلمسلیگی کېرهکلیگینی ایتدی.
او بیرلشگن ملتلر تشکیلاتی باش ییغینی نینگ ۸۱-سېسّیهسی دایرهسیده افغانستان عیاللرینینگ احوالیگه بغیشلب اۉتکزیلهیاتگن اوشبو و باشقه ییغیلیشلردن سۉنگ «معمانی محاکمه قیلیش و انیقلش باسقیچیدن اۉتیب، عملي چارهلرگه اېریشهمیز»، دېگن امید بیلدیردی.
طالبلر افغانستانده قَیته حاکمیتنی اېگهللهگنیدن بېری عیاللر و قیزلرنینگ تعلیم آلیشی همده ایشلشینی تعقیقلب، اولرنینگ جمعیتدهگی اشتراکی و فعالیتینی کېسکین چېکلب کېلماقده.
شونگه قرهمهی، خلقارا همجعیت حاضرگچه افغانستانده عیاللر حقوقلری و انسان حقوقلرینی بوزهیاتگنلیک اوچون طالبلرنی جوابگرلیککه تارتیش بۉییچه عملي چارهلر کۉرمهگن. عکسینچه، اَیریم دولتلرنینگ اوشبو گروه بیلن اۉز ارا علاقهلری کوچهیگن.
