رویترز اخبارات آژانسی اوچته منبعگه تهیهنیب خبر بېریشیچه، سعوديه عربستانی «شرق-غرب» نفت قوووری نینگ فعالیتینی قَیته تیکلهگن.
اوشبو نشر مذکور منبعلرگه تهیهنیب، بوگون (سهشنبه، ۳۱ سنبله) کون آخریگچه سعوديه عربستانی نینگ قیزیل دېنگیزدهگی «یانبو» بندریدن نفت صادراتی هم قَیته تیکلنیشی ممکنلیگینی بیلدیرگن.
سعوديه عربستانی جاري آی نینگ ۱۳-کونیده مملکت نفت قووورلریگه عراق تاماندن اویوشتیریلگن هجوم آرتیدن «شرق-غرب» نفت قوووری نینگ فعالیتینی توختهتگن اېدی.
شوندن سۉنگ قیزیل دېنگیزدهگی یانبو بندریده خام نفت یوکلش ایشلری هم توختهتیلگن.
رویترز سوداگرلرگه تهیهنیب یازیشیچه، سعوديه نفتی یېتکزیب بېریلیشی نینگ قَیته تیکلنیشی نفت نرخی نینگ پهسهییشیگه یاردم بېرگن. نتیجهده برنت نفتی نینگ فیوچېرس شرطنامهلری بیر بررېل اوچون ایکّی دالردن کۉپراققه ارزانلهگن و بو جاري آی نینگ ۸-کونیدن بویان اېنگ پست کۉرسهتکیچ بۉلگن.
امریکا و اسرایل نینگ ایرانگه قرشی اوروشی آرتیدن هرمز بۉغازی آرقهلی نفت آقیمی ایزدن چیققچ، سعوديه عربستانی اوشبو قوووردن کونیگه قریب تۉرت میلیون برل نفتنی یانبو بندریگه تشیش اوچون فایدهلنگن.
ایکّی منبع رویترزگه قووور قَیته ایشگه توشیریلگنیدن سۉنگ اونده نفت پست تېزلیکده آقهیاتگنینی ایتگن.
سعوديه دولت نفت کمپنیسی — «آرمکا» رویترز نینگ ایضاح سۉراویگه درحال جواب بېرمهگن.
منبعلردن بیری رویترز «آرامکا» نفت تشیش حجمینی ینه کونیگه تۉرت میلیون برلگه یېتکزیشگه حرکت قیلهیاتگنینی ایتگن. عینِ پیتده خوفسیزلیک ساحهسیدهگی بیر منبع عملیاتلر نینگ تۉلیق تیکلنیشی بیر نېچه هفته دوام اېتیشی ممکنلیگینی بیلدیرگن.
ایکّی سودا منبعسی هم سوداگرلر سعوديه نفتینی یوکلشگه تیارگرلیک کۉرهیاتگنی و نفت تانکېرلرینی اۉرته یېر دېنگیزیدهگی مصر نینگ «پورت-سعید» پورتیگه یۉنهلتیرهیاتگنینی ایتگن. او یېرده نفتنی بیر کېمهدن باشقه کېمهگه اۉتکزیش عملیاتی عملگه آشیریلهدی.
اوشبو قووور فعالیتی سعوديه عربستانی و یمندهگی حوثيلر اۉرتهسیدهگی مناسبتلر هنوز ترنگ بۉلیب تورگن بیر پیتده قَیته تیکلندی.
حوثيلر سعوديه عربستانیگه قرشی دېنگیز قملینی اعلان قیلگن و مملکتدهگی نفتنی قَیته ایشلش فابریکهلریگه، جملهدن، یانبو بندریدهگی تاسیساتلرگه بیر نېچه بار هجوم قیلگن.
