افغانستان نینگ بیرلشگن ملتلر تشکیلاتیدهگی نمایندهلیگی نینگ سرپرستی نصیر احمد فایق پاکستان نینگ کنر و پکتیکا ولایتلریگه اویوشتیرگن ینگی هجوملریگه مناسبت بیلدیریب، افغانستان خلقی طالبان و پاکستان نینگ «پاکستان طالبان حرکتی» (تیتیپی)گه نسبتاً سیاستی اوچون بدل تۉلهمسلیگی کېرهکلیگینی ایتدی.
فهییق بوگون کېچقورون (سهشنبه، ۳۱ سنبله) ایکسده یازیشیچه، «تینچ اهالی هېچ قچان بوندهی سیاستلرنینگ قربانی بۉلمسلیگی کېرهک».
او قۉشیمچه قیلگن: «بیز برچه ترورچیلیک حرکتلرینی همده ترورچیلیک گروهلری تامانیدن یاکه تروریزمگه قرشی کورهش نقابی آستیده عملگه آشیریلهدیگن و تینچ اهالی نینگ قربان بۉلیشیگه آلیب کېلهدیگن هر قندهی حرکتلرنی قطعیا قارهلهیمیز».
فایق نینگ ایتیشیچه، افغانستانده تروریزمگه قرشی برقرار کورهش آلیب باریش اوچون قانوني، مسوولیتلی و مجبوريتلرگه صادق حکومت موجود بۉلیشی ضرور. بو جریان خلقارا حقوق، خلقارا انسان پرور حقوق و افغانستاننینگ حدودي یخلیتلیگیگه تۉلیق رعایه قیلگن حالده عملگه آشیریلیشی کېرهک.
اونینگ تأکیدلشیچه، «بوندهی حکومتنی برپا اېتیش خلقارا همجمعیت کۉمهگیده، افغان خلقینینگ رهبرلیگی و اېگهلیگیده عملگه آشیریلیشی لازم بۉلگن عمومي مسوولیتدیر».
پاکستان دوشنبه کونی تانگ سحرده ینه کنر و پکتیکا ولایتلریدهگی نشانلرنی بامباردمان قیلدی. طالبان پاکستان «تینچ اهالیگه تېگیشلی تاسیساتلر»گه هجوم قیلگنینی معلوم قیلدی.
بو گروهنینگ بیلدیریشیچه، کنر ولایتیده اوچ نفر تینچ اهالی هلاک بۉلگن، ینه تۉرت نفری یرهلنگن. پکتیکادهگی هجوم اېسه قربانلرگه سبب بۉلمهگن.
پاکستاننینگ اخبارات و نشرلر وزیرلیگی مملکت پاکستان طالبان حرکتی و اونگه علاقهدار گروهلرنینگ بازهلری همده یشیرین جایلرینی نشانگه آلگنینی معلوم قیلدی.
وزیرلیک ۲۸ نفر «ترورچی»، جملهدن، بیر قطار خودکوشلیک هجوملرینی عملگه آشیرووچیلر اۉلدیریلگنینی بیلدیردی.
بیرلشگن ملتلر تشکیلاتی نینگ افغانستاندهگی یاردم ادارهسی هم کنر ولایتیده احتمالي هوا هجوملری عاقبتیده اوچ نفر تینچ اهالی هلاک بۉلگنینی و ینه تۉرت نفر تینچ اهالی یرهلنگنینی تصدیقلهدی.
