ایران تشقی ایشلر وزیرلیگی ایران هیئتی بیرلشگن ملتلر تشکیلاتی عمومی ییغینینینگ نیویورکدهگی ییغیلیشی دایرهسیده قطر واسطهچیلری آرقهلی امریکا بیلن «علاقه» قیلگنینی تصدیقلهدی.
صدا و سیماگه کۉره، ایران تشقی ایشلر وزیرلیگی مطبوعات سوزلاوچیسی اسماعیل بقایی بوگون (چهارشنبه، ۱میزان) ایتیشیچه، «بو علاقه ایران نینگ شرطلرینی یېتکزیش، جملهدن، برچه جبههلرده اوروشنی یکونلش، امریکانینگ تجاوزکار حرکتلرینی توختهتیش، دېنگیز قملینی و اقتصادي اوروشنی توگهتیش، ایران بایلیگینی آزاد قیلیش… مقصدیده عملگه آشیریلگن».
اوّلراق امریکا نینگ یقین شرق بۉییچه مخصوص وکیلی بیرلشگن ملتلر تشکیلاتی عمومی ییغیلیشی دایرهسیده «کون دوامیده ایکّی تامان اۉرتهسیده قتنهب تورگن واسطهچیلر آرقهلی ایران هیئتی بیلن باتفصیل مذاکرهلر آلیب بارگنلرینی» ایتگن اېدی.
او قۉشیمچه قیلیب: «اولر (واسطهچیلر) مذاکرهلر نینگ بیر باسقیچینی موفقیتلی یکونلهدیلر. امید قیلهمیزکی، بو مذاکرهلر کانتروکتیف و امیدبخش بۉلهدی. واسطهچیلر اۉز ایشلرینی دوام اېتتیرهدیلر»، — دېگن اېدی.
عینِ پیتده ایران جمهور رییسی مسعود پزشکيان و تشقی ایشلر وزیری عباس عراقچی نیویورکده بۉلیب توریبدی. ایران جمهور رییسی بوگون کېچقورون بمت عمومی ییغیلیشیده نطق سۉزلشی کوتیلماقده.
کېچه اېسه دونالد ترامپ اوشبو ییغیلیشدهگی نطقیده، اگر ایران بیلن کېلیشووگه اېریشیلمسه، بو مملکتنی یۉق قیلیشینی ایتیب، آگاهلنتیرگن اېدی.
