فاریاب ولایتیدهگی طالبلرنینگ امنیه قوماندانلیگی معلومنینگ قیلیشیچه، اوشبو ولایت نینگ پشتونکوت اولسواللیگیده یوز بیرگن ترافیک حادثهسی عاقبتیده ایکّی کیشی هلاک بۉلگن، ینه تۉرت کیشی یرهلنگن.
اوشبو قوماندانلیک بیاناتیده ایتیلیشیچه، حادثه بوگون (چهارشنبه، ۱ میزان) اېرتهلب پشتونکوت اولسواللیگی «قفلان دره» منطقهسیده صادر بۉلگن.
فاریاب ولایتیدهگی طالبلرنینگ خوفسیزلیک قوماندانلیگی بیاناتیگه کۉره، حادثه وقتیده «پروبکس» روسوملی موتر یۉلدن چیقیب کېتیب، اغدریلگن.
فاریاب ولایتیدهگی طالبلرنینگ امنیه قوماندانلیگی حادثهده جراحتلنگنلر دوالنیش اوچون فاریاب ولایت شفاخانهسیگه آلیب باریلگنینی بیلدیرگن.
حادثه نینگ کېلیب چیقیش سببی حقیده معلومات بېریلمهگن.
بو بوگون قید اېتیلگن اوچینچی ترافیک حادثهسیدیر. بونگچه تخار و بغلان ولایتلریده ینه ایکّی ترافیک حادثهسی صادر بۉلگنی حقیده خبر بېریلگن اېدی.
