روسيه نینگ کابلدهگی اېلچیخانهسی پاکستان نامینی تیلگه آلمهگن حالده، «افغانستان شرقیدهگی هوا هجوملریده تینچ اهالینینگ قربان بۉلیشیدن» خواطر بیلدیرگن.
اېلچیخانه بوگون (چهارشنبه، ۱ میزان) فیسبوکدهگی پُستیده قربانلرنینگ عایلهلریگه همدردلیک بیلدیرگن و یرهدارلرگه تېزراق ساغهییب کېتیش تیلهگینی بیلدیرگن.
روسيه اېلچیخانهسینینگ قۉشیمچه قیلیشیچه، بو مملکت برچه تامانلرنی «قرهمه-قرشیلیکدن تيیلیشگه و کېلیشماوچیلیکلرنی ملاقات آرقهلی حل قیلیشگه» چقیرهدی.
پاکستان اوردوسی دوشنبه کونی تانگده افغانستان شرقیدهگی کنر و پکتیکا ولایتلریدهگی نشانلرنی بامباردمان قیلگن.
طالبلر اوشبو هجوملرنی تصدیقلب، پاکستان «تینچ اهالی یشهیدیگن حدودلرنی» بامباردمان قیلگنینی معلوم قیلگن.
طالبلر مطبوعات کاتبی ذبیحالله مجاهدنینگ ایتیشیچه، کنر ولایتیگه اویوشتیریلگن هجوملرده اوچ نفر تینچ اهالی هلاک بۉلگن و ینه تۉرت نفر تینچ اهالی یرهلنگن. پکتیکا ولایتیدهگی هجوملرده اېسه قربانلر بۉلمهگن.
پاکستان اخبارات و نشرلر وزیرلیگی معلوم قیلیشیچه، مملکت پاکستان طالبلر حرکتی و اونگه علاقهدار گروهلر نینگ بازهلری همده یشیرین جایلرینی نشانگه آلگن و کمیده ۲۸ نفر «ترورچی»، جملهدن، بیر نېچه خودکوشلیک هجومچیلرینی اۉلدیرگن.
