ایران جمهور رییسی مسعود پزشکيان بیرلشگن ملتلر تشکیلاتی عمومی ییغینیدهگی نطقیده ایران و امریکا اۉرتهسیدهگی اوروشگه توختهلیب، «بیز اۉزیمیزنی حمایه قیلیش اوچون اوروشدن قۉرقمسلیگیمیزنی و تینچلیک اوچون مذاکرهلردن قاچمسلیگیمیزنی اثباتلهدیک»، دېدی.
ایران جمهور رییسی نطقینی امریکانینگ مینابدهگی قیزلر مکتبی و لامبرد ستدیونیگه اویوشتیرگن هجوملریده هلاک بۉلگنلر صورتلرینی کۉرسهتیشدن باشلهدی. او «بیز ملاقاتگه تیارمیز، اما اولر کوچ ایشلهتیش تیلینی قبول قیلمسلیگیمیزنی بیلیشلری کېرهک»، دېدی.
پزشکيان تیناوون آمریکا جمهور رییسی دونالد ترامپ نینگ سۉزلریگه اشاره قیلیب، شوندهی دېدی: «او بیلیب قۉیسین، تهدید خلقیمیزنی ینهده جیپسلشتیرهدی، کوچهیتیرهدی و ایرانلیکلرنینگ قرشیلیگینی آشیرهدی. او شونی هم بیلیشی کېرهککی، ایران خلقی کوچ آلدیده باش اېگمهیدی و تجاوزکارلرنی پُشیمان قیلهدی».
ایران جمهور رییسی اۉز نطقیده مملکتینینگ هستوي مسألهسیگه هم توختهلیب، «بیز اتم انرژیسینی ترقیات اوچون ایستهیمیز»، دېدی.
او قۉشیمچه قیلدی: «ایران هستوي بیلیملر نینگ بیر نېچه دولت مونوپولیهسیده بۉلیشینی قبول قیلمهیدی. اېران هستوي قورالنی خوفسیزلیک عاملی دېب حسابلهمهیدی، اما علم-فن، صناعت و تینچ مقصدلردهگی انرژیگه بۉلگن حقوقیدن هم واز کېچمهیدی».
پزشکيان، شونینگدېک، ایراننینگ هستوي مسألهسی جنگ میدانیده حل قیلینمسلیگینی و یېچیم «دنیاگه ایران دستوری نینگ تینچ مقصدلرده اېکنیگه ایشانچلی کفالت، ایران خلقیگه اېسه اۉز حقوقلری سهقلنیب قالیشیگه ایشانچ بېرهدیگن کېلیشوو» اېکنینی ایتدی.
پزشکيان دنیانینگ ایران و اسرایلگه نسبتاً ایکّی خیل مناسبتده بۉلهیاتگنینی تنقید قیلیب، شوندهی دېدی: «بۉمبه ایسرایلده، اما اینسپېکتارلر ایرانده؛ اسرایل آدم اۉلدیرهدی، اما ایران چېکلاولرگه اوچرهیدی. بو فاجعه؛ او اۉلدیرهدی، بیز اېسه چېکلاوگه اوچرهیمیز».
او قۉشیمچه قیلدی: «اگر عدالت ایزلهیاتگن بۉلسک، دۉست هم، رقیب هم بیر خیل میزان بیلن بهالنیشی کېرهک. انسان حقوقلری گېاسياسي رقابت واسطهسی اېمس. ایران علیحده امتیاز ایستهمهیدی؛ اېران تېنگ حقوقلرنی ایستهیدی و بونینگ اوچون مسوولیتنی هم اۉز ذمّهسیگه آلهدی».
پزشکيان منطقه دولتلریگه مراجعت قیلیب، «بو منطقهده هېچ کیم یالغیز اۉزی خوفسیزلیککه اېگه بۉله آلمهیدی. یا خوفسیزلیکنی بیرگهلیکده یرهتهمیز، یا بېقرارلیکنی بیرگهلیکده باشدن کېچیرهمیز»، دېدی.
تیناوون آمریکا جمهور رییسی دونالد ترامپ هم بیرلشگن ملتلر تشکیلاتی عمومی ییغینیدهگی نطقینینگ کتّه قِسمینی ایران بیلن اوروشگه بغیشلب، اگر کېلیشووگه اېریشیلمسه، اېراننی یۉق قیلیشینی ایتدی.
ترامپ عینِ پیتده امریکادهگی آرهلیق سیلاولردن سۉنگ ایران بیلن کېلیشووگه اېریشیشیگه ایشانیشینی بیلدیردی.
شو بیلن بیرگه، ایران و امریکا رسميلری بوگون قطر واسطهچیلیگیده نیویورکده مذاکره اۉتکزگنینی تصدیقلهدی.
ایران تشقی ایشلر وزیرلیگی مطبوعات سوزلاوچیسی اسمایل بقایی «بو ملاقات ایران نینگ شرطلرینی، جملهدن، برچه جبههلرده اوروشنی توگهتیش، امریکا نینگ تجاوزکار حرکتلرینی توختهتیش، دېنگیز قملی و اقتصادي اوروشنی توگهتیش، ایران نینگ موزلهتیلگن بایلیکلری آزاد قیلیش کبی مسألهلرنی یېتکزیش مقصدیده عملگه آشیریلدی»، دېدی.
امریکانینگ یقین شرق بۉییچه مخصوص نمایندهسی استیو ویتکاف هم واسطهچیلر مذاکرهلر نینگ بیر باسقیچینی موفقیتلی یکونلهگنینی و بو مذاکرهلر کانتروکتیف همده امیدبهخش بۉلیشیگه امید قیلهیاتگنینی ایتدی.
ایران و امریکا اۉرتهسیدهگی اوروش اۉتگن قویاش ییلی نینگ ۹-حوت سنهسیدن بېری دوام اېتماقده. ایکّی تامان حاضرگچه اوروشنی یکونلشی ممکن بۉلگن کېلیشووگه اېریشه آلمهدی.
