طالبلرنینگ اخبارات و مدنیت وزیرلیگی توریزم ایشلری بۉییچه معاونی قدرتالله جمال قطر دولتینینگ کابلدهگی اېلچیسی علی بن مرزوق بیلن صحبتده افغانستانده توریزم ساحهسیده همکارلیک قیلیشنی سۉرهگن.
طالبلرنینگ اخبارات و مدنیت وزیرلیگی بوگون (پنجشنبه، ۲ میزان) نشر قیلگن بیاناتیده جمال و بن مرزوق کابلده اوچرهشیب، مذاکره اۉتکزگنینی بیلدیرگن.
بیاناتگه کۉره، اوچرهشووده قطر سیاحلرینی افغانستانگه جلب قیلیش، افغانستاننینگ طبيعي، تاریخي و سیاحلیک مسکنلرینی تنیشتیریش، قطرلی سرمایهدارلری اوچون مملکتده سرمایه کیریتیش امکانیتلرینی یېنگیللشتیریش همده ایکّی دولت اۉرتهسیده توریزم ساحهسیدهگی همکارلیک اوچون رسمي میکانیزم یرهتیش مسألهلری اساسي محاکمه موضوعلری بۉلگن.
قدرتالله جمال مملکت.نینگ طبيعي گۉزللیکلری، تاریخي بنالری، قدیمي یادگارلیکلری و تورلی سیاحلیک مسکنلریگه اشاره قیلیب، افغانستانده قطرلیک سیاحلر و سرمایهدارلر بیلن همکارلیک قیلیش اوچون قولهی امکانیتلر موجودلیگینی ایتگن.
قطر دولتینینگ کابلدهگی اېلچیسی علی بن مرزوق علی بن مرزوق الشملان القاشوطی ایکّی دولت اۉرتهسیدهگی مدني علاقهلرنینگ اهمیتیگه اورغو بېریب، افغانستان و قطر اۉرتهسیدهگی مناسبتلرنی ینهده کېنگهیتیریش و همکارلیکنی مستحکملش اوچون «دایمي ملاقات» ضرورلیگینی تأکیدلهگن.
طالبان ۲۰۰۱-ییلده افغانستاننینگ اېنگ مشهور قدیمي یادگارلیکلریدن بۉلگن بامياندهگی بودا هیکللرینی پارتلهتیب، ویران قیلگن. حاضر اېسه صلصال و شهمامه هیکللری نینگ بۉشهب قالگن رواقلری طالباننینگ توریزم ساحهسیدن آلهدیگن اساسي درآمد منبعلریدن بیریگه ایلنگن.
طالبلر سۉنگگی ییللرده «عمومي خوفسیزلیک» و «خارجلیکلر خوفسیزلیگی» حقیدهگی تصورنی ترغیب قیلیب، خارجدن سیاحلرنی افغانستانگه جلب قیلیشگه اورینماقده. بیراق آستقورمهنینگ یېترلی درجهده رواجلنمهگنی و اوشبو گروه تامانیدن جاري اېتیلگن چېکلاولر سببلی افغانستانده توریزم ساحهسی جمهوریت دوریگه نسبتاً سېزیلرلی درجهده اۉزگرمهگن.
باشقه تاماندن، طالبلر عیاللر و عایلهلرنینگ کۉنگیلآچر همده سیاحلیک مسکنلریگه باریشینی تعقیقلهگن. بو اېسه ایچکی توریزمنینگ کېسکین کمهییشیگه سبب بۉلگن. عینِ پیتده طالبلر خارجلیک عیال سیاحلرنی، اینیقسه افغانستاندهگی وضعیتنی «خوفسیز» دېب ترغیب قیلووچی یوتوبېرلرنی ایلیق کوتیب آلماقده.
