طالبلر تشقی ایشلر وزیرلیگی کابلدهگی پاکستان اېلچیخانهسی نینگ سرپرستینی چقیریب، «افغانستان هوا حدودینینگ بوزیلیشی و پاکستان اوردوسینینگ مملکتنینگ بیر قطار ولایتلریگه اویوشتیرگن هوا هجوملری» یوزهسیدن کېسکین و قطعي ناراضیلیگینی بیلدیرگن همده اونگه ناراضیلیک اعتراضینی تاپشیرگن.
اوشبو وزیرلیک بوگون (پنجشنبه، ۲ میزان) توشدن کېین بیانات ترقهتیب، طالبان پاکستاننینگ هجوملرینی «قطعي قارهلشی»نی و اولرنی افغانستاننینگ ملي حاکمیتی همده حدودي یخلیتلیگی نینگ آچیقدن-آچیق بوزیلیشی، شونینگدېک، اسلامي، خلقارا، انسانپرورلیک و قۉشنیچیلیک تمایللریگه ضد دېب بیلیشینی ایتگن.
طالبلر تشقی ایشلر وزیرلیگی، شونینگدېک، افغانستان توپاغیدن پاکستانگه قرشی فایدهلنیلهیاتگنی حقیدهگی دعوالرنی رد اېتیب، بوندهی دعوالر اساسیده حربي حرکتلرنی آقلشنی حقیقت و جماعتچیلیک فکرینی بوزیب کۉرسهتیش همده پاکستاننینگ ایچکی موفقیتسیزلیکلرینی یهشیریشگه اورینیش دېب حسابلشینی بیلدیرگن.
وزیرلیکنینگ قۉشیمچه قیلیشیچه، «بوندن تشقری، پاکستاننینگ حربي رېجیمی بوندهی حرکتلر آرقهلی اۉزینی معماگه ارهلشگن تامان صفتیده کۉرسهتیشگه اورینماقده، تاکه منطقه مملکتلری آلدیدهگی مجبوريتلرینی بجریشدن قاچسین. بو اېسه وضعیتنی ینهده بېقرارلشتیریب، کېسکینلیکنی آشیرهدی».
پاکستان بوگون تانگده افغانستاننینگ قندهار، خوست و پکتيا ولایتلریدهگی نشانلرگه هجوم قیلگن.
طالبلر اوشبو هجوملرده تۉرت نفر تینچ اهالی هلاک بۉلگنینی معلوم قیلگن، بیراق هجوملرنینگ نشانلری حقیده معلومات بېرمهگن.
محلي منبعلر «اطلاعات روز» گزبتهسیگه بېرگن معلوماتگه کۉره، اوشبو هجوملرده اساسن طالبلرگه تېگیشلی حربي مرکزلر نشانگه آلینگن.
بو پاکستاننینگ جاري هفته دوامیده افغانستانگه اویوشتیرگن ایکّینچی هجومیدیر. پاکستان اوردوسی دوشنبه کونی تانگده هم کنر و پکتیکا ولایتلریدهگی نشانلرنی بامباردمان قیلگن اېدی. کنر ولایتیدهگی هجوملرده اوچ کیشی هلاک بۉلیب، تۉرت کیشی یرهلنگن اېدی.
طالبان تشقی ایشلر وزیرلیگی اۉشه هجومگه مناسبت بیلدیررکن، کابلدهگی پاکستان اېلچیخانهسی نینگ سرپرستینی هم چقیریب، اونگه ناراضیلیک اعتراض تاپشیرگن اېدی.
