منبعلر کابل شهریده «طالبلر» نینگ امر به معروف و نهی از منکر خادملری تخمیناً ۱۶ عیالنی حبسگه آلگنینی اَیتماقده.
بیر منبع «اطلاعات روز» گزیتهسیگه بېرگن معلوماتیده بو عیاللر سهشنبه کونی (۳۲-سنبله) کابل شهرینینگ «شاهدو شمشره» منطقهسیدن حبسگه آلینگنینی ایتدی.
منبعگه کۉره، دستلب حبسگه آلینگن عیاللر سانی ۲۰ نفر بۉلگن، بیراق اولرنینگ تۉرت کیشیسی مبایل تیلفونلری تېکشیریلگچ و عایلهلری کفیللیگی بیلن آزاد قیلینگن. قالگن ۱۶ کیشی عیال اېسه هنوز حبسده قالماقده.
«اطلاعات روز» گزیتهسیگه ویدیو هم یوباریلگن. ویدیوده طالبان خادیمی بۉلیشی احتمال قیلینگن بیر عیال باشقه بیر عیالنی موترگه کیریتیشگه اورینهیاتگنی، بیراق او عیال قرشیلیک کۉرسهتهیاتگنی کۉرینهدی. واقعه جاییده طالبلرنینگ بیر اېرکک خادیمی و موتر ایچیده ینه بیر نېچه عیال هم کۉرینهدی.
منبع اوشبو ویدیو «شاهدو شمشره» حدودیدهگی عیاللر حبسگه آلینگن پیتگه تېگیشلی اېکنینی اَیتماقده، بیراق «اطلاعات روز» گزیتهسی اونی مستقل روشده تصدیقلهی آلمهگن.
طالبلرنینگ امر به معروف و نهی از منکر خادملری بوندن آلدین هم عیاللرنی بو گروه طلب قیلگن کيینیش قاعدهلریگه رعایه قیلمهگنلیکده عیبلب، کۉچهلردن بیر نېچه بار حبسگه آلگن و قماققه تشلهگن.
طالبلرنینگ امر به معروف و نهی از منکر تۉغریسیدهگی قانونیده عیالنینگ بوتون بدنینی یاپیشی «مجبوري» دېب بېلگیلنگن و عیالنینگ آوازی «عورت» دېب حسابلنگن.
