رویترز اخبارات آژانسینینگ خبر بېریشیچه، امریکالیک و ایرانلیک مذاکرهچیلر نیویورکده اوروشنی توگهتیش بۉییچه باسقیچمه-باسقیچ یۉلنی محاکمه قیلماقده. اونگه کۉره، تهران هرمز بۉغازینی قَیته آچهدی، واشنگتن اېسه ایرانگه نسبتاً اقتصادي قملنی بېکار قیلهدی.
مذاکرهلردن خبردار منبعلر نینگ ایتیشیچه، هرمز بۉغازی امریکا و ایران اۉرتهسیده قریب یېتّی آیدن بېری دوام اېتهیاتگن ماجرانی توگهتیش بۉییچه مذاکرهلرده اېنگ مهم سودالشوو واسطهسیگه ایلنگن. ایران امریکا قملی نینگ مملکت اقتصادیاتیگه یېتکزهیاتگن باسیمینی کمهیتیریشنی ایستهماقده. واشنگتن اېسه حاضر تهران تامانیدن تۉسیب قۉییلگن، دنیادهگی نفت تشیش نینگ اېنگ مهم یۉنهلیشلریدن بیری بۉلگن اوشبو بۉغاز آرقهلی کېمهلر نینگ اېرکین حرکتلنیشینی خواهلهماقده.
رویترز بیلن صحبتلشگن ایکّی ایرانلیک منبع، ایکّی منطقوي رسمي و ایکّی غرب دیپلوماتیک منبعسیگه کۉره، مذاکرهلر کتّه تۉسیققه دوچ کېلگن. چونکه هر ایکّی تامان هم باسیم واسطهسیدن بیرینچی بۉلیب واز کېچیشنی ایستهمهیپتی.
ایراننینگ یوقاری مرتبهلی رسميسینینگ ایتیشیچه، باشی بېرک کۉچهدن چیقیش نینگ اېنگ احتمالي یۉلی باسقیچمه-باسقیچ کېلیشوو بۉلیشی ممکن. اونگه کۉره، ایران هرمز بۉغازیدن کېمهلرنینگ اۉتیشیگه رخصت بېرهدی، بونینگ عوضیگه امریکا اقتصادي قملنی بېکار قیلهدی و تهران، احتمال، موزلهتیب قۉییلگن بایلیکلردن فایدهلنیش امکانیتیگه اېگه بۉلهدی.
او بیرلشگن ملتلر تشکیلاتی عمومی ییغیلیشی دایرهسیده شوندهی دېدی: «آلدینده تورگن یۉللردن بیری انقراضنی باسقیچمه-باسقیچ حل قیلیشدیر. بیرینچی باسقیچ قملنی توگهتیش و هرمز بۉغازینی قَیته آچیش بۉلهدی».
ایران تشقی ایشلر وزیری عباس عراقچی هم بیرلشگن ملتلر تشکیلاتی عمومی ییغیلیشی دایرهسیده تهران واسطهچیلر آرقهلی «هرمز بۉغازینی قَیته آچیش بۉییچه رېجه تقدیم اېتگنینی» ایتدی.
اونینگ قۉشیمچه قیلیشیچه، اگر امریکا تامانیدن اَیریم شرطلر بجریلسه، هرمز بۉغازی «یېتّی کوندن کېین قَیته آچیلهدی».
او شوندهی دېدی: «بو شرطلر ینگی اېمس و اوّل اسلام آباد شرطنامهسی ایلگری سوریلگن مسألهلر نینگ اۉزیدیر».
