امریکا تشقی ایشلر وزیری مارکو روبیو بریتانياده‌گی فرفورد پایگاه سیده یوز بېرگن خوفسیزلیک حادثه‌سیده خارجي بیر شخص یاکه گروه‌نینگ قۉلی بارلیگینی ایتدی.
روبیو دوشنبه کونی کېچقورون (۶-میزان) ژورنالیستلرگه: «بریتانياده صادر بۉلگن واقعه و صادر بۉلیشی ممکن بۉلگن نرسه جوده جدّي وضعیت اېکنینی ایتیش نینگ اۉزی کفایه»، دېدی.
او باتفصیل معلومات بېریشدن باش تارتدی، بیراق بو ایشده «خارجي اکتور» نینگ قۉلی بارلیگینی ایتدی.
بریتانیا پولیسی ایکّی کون اوّل امریکا ابرانگه قرشی هجوملر اوچون فایده‌لنه‌یاتگن «فرفورد» پایگاهسی یقینیده بېش کیشینی حبسگه آلدی. اولر حبسگه آلینیشیدن آلدین یوزلریگه نقاب تقّن حالده اوچته آق فورگان بیلن یۉلنی تۉسیب قۉیگن اېدی.
یاشی یاش بۉلگن و برچه‌سی بریتانیا فقرالری بۉلگن بو شخصلر جدّي خوفسیزلیک حادثه‌سینی رېجه‌لشتیریشده عیبلنماقده.
بریتانیا پولیسی بو یاشلرنی پارتلاوچی مادّه‌لر تۉغریسیده‌گی قانون دایره‌سیده‌گی جنایتلرنی صادر اېتیشده گمان قیلیب، شونینگدېک، «ترورچیلیک حرکتیگه تیارگرلیک کۉریش» گمانی بیلن حبسگه آلگن.
امریکاجمهور رییسی دونالد ترامپ بو شخصلر «کتّه ضرر یېتکزیشنی رېجه‌لشتیرگنینی» ایتدی.
اما بریتانیا مدافعه وزیری اما وس استریتینگ: «حاضرچه بو شخصلرنینگ ماتیولری حقیده تخمین قیلیش تۉغری اېمس»، دېدی.
