اسرایل ییتکرمه‌لری دبیدن تیل آویوگه یول آلگن فلای دبی اوچاقی فوق العاده سیگنال و اوچاقنی آلیب قاچیش آگاهلنتیرووچی کودینی یوبارگنیدن سۉنگ، یۉنه‌لیشینی اۉزگرتیریب، سعوديه عربستانیگه قۉنگنی حقیده خبر بېردی.
«تایمز اسرائيل» گزیته‌سی‌نینگ یازیشیچه، اوچاق بوگون (چهارشنبه، ۸میزان) اېرته‌لب دبیدن تیل آویو تامان اوچه‌یاتگن پیتده، سعوديه عربستانی حدودی اوستیدن اۉتیب کېته‌یاتیب، دستلب ۷۷۰۰کودینی یوبارگن. بو کود عمومي فوق العاده وضعیتنی انگله‌ته‌دی. شوندن سۉنگ اوچاق قیسقه مدتگه ۷۵۰۰ کودینی یوبارگن. خلق‌ارا هوانوردلیکده بو کود «قانونگه خلاف اره‌لشوو» و اوچاقنی آلیب قاچیش احتمالینی بیلدیره‌دی.
اوشبو ییتکرمه خبریگه کۉره، اوچاق عینِ پیتده یۉنه‌لیشینی سعوديه عربستانی تامان اۉزگرتیرگن و پرواز بلندلیگینی په‌سه‌یتیرگن.
آگاهلنتیریشنی آلگنیدن سۉنگ، اسرایل حربي-هوا کوچلری‌نینگ بیر نېچه قیرووچی اوچاقی وضعیتنی تېکشیریش اوچون هواگه کۉتریلگن.
اوچاقنی آلیب قاچیش حقیده‌گی آگاهلنتیریش اعلان قیلینگن بیر پیتده اسرایل باش وزیری بنیامین نتانیاهو و مدافعه وزیری اسراېل کَتس فوق العاده خوفسیزلیک ییغیلیشینی اۉتکزگن.
«اسرائيل تایمز»نینگ یازیشیچه، تخمیناً ۱۸۰ کیشی یۉلاوچیسی بۉلگن اوشبو اوچاق سعوديه عربستانی‌نینگ شِمالی-غربیده‌گی «تابوک» قونالغه‌سی تامان یۉل آلگن و او یېرگه قۉنگن.
اوچاق قۉنگنیدن سۉنگ، اسرایل خوفسیزلیک منبعلری اوچاقنی آلیب قاچیش احتمالی استثنا قیلینگنینی بیلدیرگن.
خوفسیزلیک منبعلری‌نینگ ایتیشیچه، آگاهلنتیرووچی کودلر نینگ یوباریلیشیگه، احتمال، «ایکّی اوچووچی اۉرته‌سیده‌گی ماجرا» سبب بۉلگن. بیراق اوشبو واقعه تفصیلاتلری حاضرچه فلای دبی شرکتی یاکه بیرلشگن عرب امیرلیکلری و سعوديه عربستانی هوانوردلیک رسميلری تامانیدن رسماً معلوم قیلینمه‌گن.
