امریکا قوشمه ایالتلری مرکزي قوماندانلیگی (سنتکام)نینگ معلوم قیلیشیچه، امریکا حربيلری و حربي تخنیک‌لری‌نینگ عراقدهگی اربیل هوا میدانیدن آلیب چیقیلیشی بوگون (چهارشنبه، ۸ میزان) یکونلنگن.
عراق شِمالیده‌گی اربیل هوا پایگاهی امریکانینگ مملکت حدودیده‌گی سۉنگگی حربي بازه‌سی بۉلگن. امریکا و داعش‌گه قرشی ائتلاف‌نینگ بیر مینگ و ۵۰۰ گه یقین حربي خدمتچیسی‌نینگ اساسي قِسمی شو بازه‌ده جایلشگن اېدی.
امریکا قۉشینلری‌نینگ عراقدن آلیب چیقیلیشی ایکّی دولت حکومتلری اۉرته‌سیده ۲۰۲۴-ییلده اېریشیلگن کېلیشوو اساسیده عملگه آشیریلگن.
امریکا ۲۰۰۳ـ ییلده عراققه باستیریب کیریب، صدام حسین حکومتینی اغدریشی آرتیدن مملکتنی باسیب آلگن.
امریکانینگ عراققه هجومیدن سۉنگ مملکتده اساسن شیعه حزبلری اشتراکیده‌گی ینگی حکومت شکللندی. امریکا حربيلری ییللر دوامیده صدام حسین طرفدارلری و «القاعده»گه قرشی جنگ آلیب باردی.
امریکا حربيلری ۲۰۱۱-ییل آخریده عراقنی ترک اېتگن اېدی. بیراق قریب اوچ ییل اۉتیب، عراق و سوريه‌‌نینگ کتّه حدودلریده داعش‌نینگ تېز سرعتلرده آلدینگه سیلجیشیدن سۉنگ، عراق کوچلریگه اوشبو گروهگه قرشی کوره‌شده یاردم بېریش اوچون مملکتگه ینه قَیتدی.
امریکا و داعش‌گه قرشی ائتلاف ۲۰۱۴-ییلده داعش‌گه قرشی «قطعي اراده» عکلیاتینی باشله‌دی. عراقده داعش‌گه قرشی اوروش ۲۰۱۷-ییلگچه دوام اېتدی و گروه‌نینگ اۉزینی خلیفه‌لیک دېب اعلان قیلگن توزیلمه‌سی مغلوبیتگه اوچره‌شی بیلن یکونلندی.
شونگه قره‌مه‌ی، داعش‌نینگ اَیریم یشیرین گروهلری عراق و سوريه نینگ اَیریم حدودلریده هنوز فعال بۉلیب، وقتی-وقتی بیلن اوشبو ایکّی مملکتده هجوملر اویوشتیریب کېلماقده.
معلوم قیلیشیچه، امریکاحربيلری حاضر اردن‌گه کۉچیریلگن و ائتلاف همکارلری همده سوريه حکومتی بیلن بیرگه‌لیکده سوريه‌ده داعش‌گه قرشی کوره‌ش ماموریتی دوام اېتتیره‌دی.
سنتکام «بیز چېکینیب، عراق خوفسیزلیگی اوچون اساسي مسوولیتنی تۉلیق عراق حکومتی و اوشبو مملکت‌نینگ جسور خلقیگه تاپشیره‌یاتگن بیر پیتده، منطقه بۉیلب جایلشگن امریکا و ائتلاف کوچلری داعش تامانیدن هر قنده‌ی تهدید یوزه‌گه کېلگن تقدیرده جواب قَیتریشگه تیار بۉلیب قاله‌دی.»
امریکا حربيلری عراقدن رېجه‌لشتیریلگن چیقیشنی اۉتگن ییل اکتوبر آییده باشله‌گن اېدی. اېندیلیکده اوشبو جریان یکونلنیشی بیلن امریکانینگ عراقدهگی حربي اشتراکی هم توگه‌دی و مملکت خوفسیزلیگینی تأمینلش مسوولیتی تۉلیق عراق حکومتیگه اۉتدی.
امریکا عراقدن ایران بیلن اوروش آلیب باره‌یاتگن بیر پیتده چیقیب کېتماقده.
ایران بیلن اوروش باشلنگنیدن بېری عراقدهگی امریکاگه قره‌شلی حربي بازه‌لر و تاسیساتلر ایرانگه طرفدار قوراللی گروهلر تامانیدن بیر نېچه بار هجومگه اوچره‌گن.
