ایران حکومتی مطبوعات سوزلاوچیسی فاطمه مهاجرانی، اوشبو مملکت تشقی ایشلر وزیری، عباس عراقچی قطر واسطه‌چیلیگی آرقه‌لی تهران‌نینگ هرمز بۉغازینی یېتّی کونلیک مدتگه قَیته آچیش پشنهادیگه امریکا بېرگن جوابنی آلگنینی تصدیقله‌دی.
تسنیم خبریگه کۉره، مهاجرانی عراقچی بوگون (چهارشنبه، ۸ میزان) امریکانینگ جوابینی حکومت ییغیلیشیده ایران جمهور رییسی مسعود پزشکيانگه تقدیم اېتگنینی ایتگن.
ایران نیویورکده بیرلشگن ملتلر تشکیلاتی باش اسّمبلېیه‌سی‌نینگ ۸۱-ییغینی دایره‌سیده هرمز بۉغازینی یېتّی کونلیک مدتگه قَیته آچیش عوضیگه چېکلاولرنی کمه‌یتیریش و دېنگیز قملینی بېکار قیلیشنی نظرده توتووچی رېجه‌نی تکلیف قیلگن.
امریکا جمهور رییسی دونالد ترامپ بو رېجه‌نی رد اېتگنینی معلوم قیلگن. بیراق قطر واسطه‌چیلیگیدن سۉنگ امریکا هم اوشبو رېجه‌گه اۉز جوابینی تقدیم اېتگنی ایتیلماقده.
عینِ پیتده رویترز اخبارات آژانسی ایران و امریکا یېتّی کونلیک رېجه‌نی عملگه آشیریش ترتیبی بۉییچه کېلیشماوچیلیککه اېگه اېکنینی، بیراق رېجه‌‌نینگ اساسي قِسملری باره‌سیده کېلیشماوچیلیک یۉقلیگینی خبر قیلگن.
اوشبو رېجه‌‌نینگ تۉلیق تفصیلاتلری حلی اعلان قیلینمه‌گن. بیراق خبرلرگه کۉره، ایران یېتّی کون دوامیده ایشانچنی مستحکملش و یکونده اسلام آباد کېلیشووی‌نینگ اساسي بندلریگه قَیتیشنی ایسته‌ماقده.
