سعوديه عربستانی ملی هوا یوللر ترانسپورت اداره‌سی باشلیغی بوگون (سه‌شنبه، ۱۴ میزان) تیناوون یمن چېگره‌سی یقینیده‌گی جازان و نجران قونالغه‌لریگه اویوشتیریلگن هجوملرده کمیده اوچ کیشی یره‌لنگنینی معلوم قیلدی. بو هجوملر یمنده‌گی حوثیلر بیلن تۉقنه‌شوولر کوچه‌ییب باره‌یاتگن بیر پیتده صادر بۉلگن.
سعوديه عربستانی ملکی هوا یوللر ترانسپورت اداره‌سی اینتېرنېتده نشر قیلگن بیاناتیده: «اوشبو هجوملر نتیجه‌سیده اوچ کیشی یېنگیل جراحت آلدی و مادّي ضرر یېتکزیلدی»، دېب بیلدیردی.
حوثيلر دوشنبه کونی کېچقورون سعوديه عربستانی‌نینگ جَنوبیده‌گی تورلی حدودلرده، جمله‌دن، قونالغه‌لر و حربي اۉبژېکتلرگه هجوم قیلگنینی معلوم قیلدی.
یمنده‌گی حوثیلر بیلن سعوديه عربستانی اۉرته‌سیده‌گی کېسکینلیک تاباره کوچه‌یماقده.
اېراندن قۉللب-قوّتلنه‌دیگن یمنده‌گی حوثیلر سعوديه عربستانی هوا حدودینی، مککه و مدینه آسمانیدن تشقری، «اوروش نینگ اۉپیرا‌تسیان حدودی» دېب اعلان قیلیب، برچه اویه‌کامپه‌نيه‌لرنی سعوديه عربستانی هوا حدودیده پرواز قیلمسلیک حقیده آگاهلنتیردی.
بو گروه سۉنگگی تۉقنه‌شوولرده سعوديه عربستانیده‌گی نفت تاسیساتی راکت همده درونلر یاردمیده نشانگه آلگن.
باشقه تاماندن، سعوديه عربستانی تامانیدن قۉللب-قوّتلنه‌دیگن یمن حکومتی حوثیلر یقینده اېگه‌للب آلگن حدودلرنی قَیتریب آلیش اوچون اۉز حربي عملیاتلرینی کوچه‌یتیردی.
یمن حکومت کوچلری کېچه باب المندب بۉغازینی حوثيلردن قَیتریب آلگنینی دعوا قیلدی، بیراق حوثيلر بو خبرنی رد اېتدی.
کېسکینلیک کوچه‌ییشی آرتیدن سعوديه عربستانی نینگ اتفاقچیلری بۉلگن تورکيه و پاکستان «مککه مدافعه پکتی» دایره‌سیده سعوديه عربستانیگه یاردم بېریش اوچون اۉز قۉشینلرینی یوباریشینی معلوم قیلدی.
