پاکستان فدرا‌ل حکومتی وزیرلر محکمه‌سی خیبر پختونخوا ایالتیده «فوق العاده حالت» اعلان قیلدی.
«دان» گزیته‌سی‌نینگ خبر بېریشیچه، اوشبو قرار بوگون (یک‌شنبه، ۱۹میزان) وزیرلر محکمه‌سی ییغیلیشیده معقوللنگن و کېینچه‌لیک جمهور رئیس تامانیدن تصدیقلنگن.
مذکور نشر خبریگه کۉره، پاکستان جمهور رئیس دفتری اوشبو قرار فدرا‌ل قانونی نینگ ۲۳۲- و ۲۳۴-مادّه‌لری اساسیده قبول قیلینگنینی بیلدیرگن.
قرار شهباز شریف، پاکستان باش وزیری، فدرا‌ل وزیرلر محکمه‌سی ییغیلیشیگه رئیسلیک قیلگنیدن کۉپ اۉتمه‌ی قبول قیلینگن. ییغیلیشده اونگه خیبر پختونخوا ایالتیده‌گی خوفسیزلیک وضعیتی حقیده حسابات تقدیم اېتیلگن.
پاکستان باش وزیری شهباز شریف اداره‌سی‌نینگ معلوم قیلیشیچه، وزیرلر محکمه‌سی ییغیلیشیده خیبر-پختونخواده‌گی وضعیت محاکمه قیلینگن. ییغیلیش اشتراکچیلری ایالت حکومتی تروریزمگه قرشی کوره‌شدن اته‌یلب چېکینه‌یاتگنینی کۉرسه‌تووچی حجتلرنی تقدیم اېتگن.
شوندن سۉنگ، وضعیت نینگ «یامانلشگنی»نی حسابگه آلیب، باش وزیر جمهور رئیس که «اۉزی نینگ قانوني صلاحیتلریدن فایده‌لنیب، اساسی قانون‌نینگ ۲۳۲- و ۲۳۴مادّه‌لریگه موافق اوشبو ایالت‌ده فوق العاده حالت جاري اېتیشنی» توصیه قیلیشی تکلیف اېتیلگن.
پاکستان جمهور رییسی آصف علی زرداري وزیرلر محکمه‌سی تکلیفینی معقوللب، خیبر-پختونخوا ولایتیده فوق العاده حالت اعلان قیلگن.
پاکستان فدرا‌ل اساسی قانون‌نینگ ۲۳۲-مادّه‌سیده ولایتده فوق العاده حالت اعلان قیلیش ترتیبی بېلگیلنگن.
اوشبو مادّه‌گه کۉره، اگر جمهور رئیس اوروش، تشقی تجاوز یاکه ایالت حکومتی نظارت قیلیشگه قادر بۉلمه‌گن ایچکی ترتیبسیزلیکلر طفیلی پاکستان یاکه اونینگ بیر قِسمی خوفسیزلیگیگه جدّي تهدید توغیلگنیگه ایشانچ حاصل قیلسه، فوق العاده حالت جاري اېتیش تۉغریسیده فرمان چیقریشی ممکن.
پاکستان باش وزیری شهباز شریف وزیرلر محکمه‌سی ییغیلیشیده پاکستان عدالت حرکتی (پتی) پارتیه‌سیگه مملکت نینگ اقتصادي برقرارلیگیگه پوتور یېتکزیشگه یۉل قۉیمسلیگینی ایتگن.
اونینگ تأکیدلشیچه، ایکّی تامان اۉرته‌سیده‌گی موجود کېسکینلیک شرایطیده پتی رهبرلیگیده‌گی خیبر-پختونخوا ایالتی حکومتیگه اقتصادي برقرارلشتیریش جریانیگه تۉسقینلیک قیلیشگه رخصت بېریلمسلیگی کېره‌ک.
خیبر-پختونخوا ایالتی‌نینگ باش وزیری سهیل آفریدي عینِ پیتده سۉنگگی بیر نېچه کون دوامیده اسلام‌اباد تامان کېنگ کۉلملی یوریش اویوشتیره‌یاتگن کۉپلب نمایشچیلرگه باشچیلیک قیلماقده.
جاري ییلده خیبر-پختونخواده ترتیبسیزلیکلر کېسکین کوچه‌یدی. پاکستان فدرا‌ل حکومتی مملکتده‌گی بې‌قرارلیک نینگ کتّه قِسمینی ایالت حکومتی نینگ پاکستان طالبانیگه (تی‌تی‌پی) قرشی کوره‌شیشگه یېترلیچه اراده کۉرسه‌تمه‌یاتگنی، شونینگدېک، افغانستانده‌گی طالبان نینگ اوشبو گروهنی قۉللب-قوّتله‌یاتگنی بیلن ایضاحله‌ماقده.
