خلق‌ارا مهاجرت تشکیلاتی (آی‌اوام) بوگون معلوم قیلیشیچه، جیبوتیده ۳۵۰نفر مهاجرنی آلیب کېته‌یاتگن قَییق اغدریلیب کېتیشی عاقبتیده کمیده ۱۰۹ کیشی، جمله‌دن، ۱۵ باله هلاک بۉلگن و ینه ۱۱۶ کیشیدن آرتیق انسان هنوز بې‌درَک یۉقالگن.
قَییقدن امان قالگنلر نینگ ایتیشیچه، اوشبو کېمه جیبوتیدن یمنگه قره‌ب یۉل آلگن و ۸-اکتوبردن ۹-اکتوبرگه اۉتر کېچه‌سی آبوک شهری‌نینگ شِمالیده‌گی گوهره حدودی یقینیده اغدریلیب کېتگن.
حاضرگچه تاپیلگن ۱۰۹ جسددن ۵۲ نفری اېرکک، ۴۲ نفری عیال و ۱۵ نفری باله‌لر بۉلیب، اولر آره‌سیده تۉقّیز قیز و آلتی اۉغیل بار.۸۰ نفردن آرتیق کیشی اوشبو حادثه‌دن امان قالگن. اولر نینگ برچه‌سی اتویپیا فقرالریدیر.
جیبوتیده‌گی خلق‌ارا مهاجرلر تشکیلاتی وکالت‌خانه‌سی باشلیغی الکساندر کویساک شونده‌ی دېدی: «بو دهشتلی انساني یۉقاتیشدیر. بیز امان قالگنلر، شونینگدېک، یقینلرینی یۉقاتگن یاکه قرینداشلری نینگ تقدیریدن هنوز خبرسیز بۉلگن عایله‌لر حقیده قیغوره‌میز.»
اونینگ قۉشیمچه قیلیشیچه، «بو فاجعه مهاجرلر اقتصادي امکانیت ایزلب باره‌دیگن مهاجرت یۉلیده دوچ کېله‌یاتگن خوفلرنی ینه بیر بار یقّال کۉرسه‌تماقده».
هر ییلی افریقا شاخی منطقه‌سیدن اۉن مینگلب مهاجرلر جیبوتی آرقه‌لی اۉتیب، باب المندب بۉغازیدن اۉتگن حالده یمنگه باره‌دیلر. اولر خوفسیزلیک، برقرارلیک و ایش امکانیتلرینی تاپیش امیدیده فارس کۉرفزی دولتلریگه یېتیب باریشنی ایسته‌یدیلر.
بیرلشگن ملتلر تشکیلاتی یمنده‌گی زۉرآورلیکلرگه قره‌مه‌ی، مهاجرلر فارس کۉرفزی دولتلریگه یېتیب باریش امیدیده اوشبو خوفلی سفرلرنی دوام اېتتیره‌یاتگنینی بیلدیرگن.
خلق‌ارا مهاجرلر تشکیلاتی‌نینگ معلوم قیلیشیچه، ۱۰-سپتمبردن بویان تشکیلات نینگ «حرکتلنیشنی کوزه‌تیش تیزیمی» معلوماتلریگه کۉره، اتویپیادن جیبوتیگه ۲۰ مینگدن آرتیق کیریب کېلیش حالتی قید اېتیلگن.
خلق‌ارا مهاجرت تشکیلاتی‌نینگ «بې‌درَک یۉقالگن مهاجرلر لایحه‌سی» معلوماتلریگه کۉره، ۲۰۲۵-ییلده اوشبو یۉنه‌لیشده ۹۰۰ نفردن آرتیق مهاجر هلاک بۉلگن یاکه بې‌درَک یۉقالگن.
