امریکا وکیللر اعضاسی نینگ اوچ نفر دموکرا‌ت وکیلی کانگرس نینگ ینه ۷۴اعضاسی بیلن بیرگه مملکت حربي وزیری پیت هگست یۉلله‌گن مکتوبیده ایرانده تینچ اهالیگه قرشی صادر اېتیلگن اوچته هلاکتلی هجوم یوزه‌سیدن توشونتیریش بېریشنی، حربي تېکشیروولر نتیجه‌لرینی اعلان قیلیشنی و امریکا اوردوسی‌نینگ تینچ اهالینی حمایه قیلیش چاره‌لرینی قَیته کۉریب چیقیشنی طلب قیلگن.
کلرادو شتاتیدن وکیل و آمریکا وکیللر اعضاسی نینگ قوراللی کوچلر کمیته‌سی اعضاسی جیسون کرو، آریزونا ایالتیده وکیل یاسمین انصاری و کَلیفورنیا ایالتیدن وکیل سارا جیکوبز ینه ۷۴ نفر کانگرېسمن نینگ قۉللب-قوّتلشی بیلن اوشبو مکتوبنی سه‌شنبه کونی (۲۱میزان) اعلان قیلگن.
اوّلراق اوردو رنجر و چتربازان قۉشینلریده خدمت قیلگن جیسون کرو امریکا کانگرسیده «قوراللی ماجرالرده تینچ اهالینی حمایه قیلیش گروهی» اعضاسی حسابلنه‌دی.
کرو، انصاري و جیکوبز مکتوبده اوچته هجوم — کوهستکده‌گی تۉی مراسمی، مینبده‌گی قیزلر مکتبی و لامرد سپورت سالونیگه قیلینگن هجوملرنی تیلگه آلگن.
اولر نینگ ایتیشیچه، خبرلرگه کۉره، جاري ییل نینگ ۱ـ سپتمبریده ابران جَنوبیده‌گی کوهستک شهریده بۉلیب اۉتگن تۉی مراسمیگه قیلینگن هجومده کمیده بېش نفر تینچ اهالی، جمله‌دن، ۴ و ۱۶ یاشلی ایکّی باله هلاک بۉلگن، ینه اۉنلب کیشی یره‌لنگن.
کانگرس وکیللری «واشنگتن پُست» نشری خبریگه ته‌یه‌نیب، عملیاتدن خبردار بیر عملدار امریکا نینگ اوشبو هجومگه علاقه‌دار بۉلیشی و «باشقه‌ریله‌دیگن بۉمبه»دن فایده‌لنیلگن بۉلیش احتمالینی یوقاری دېب بهاله‌گنینی ایتگن.
شونینگدېک، کانگرسمنلر ۲۸-فبروری کونی امریکا و اسرایل‌نینگ ایرانگه قرشی اوروشی باشلنگن بیرینچی کونده صادر بۉلگن ینه ایکّی هجومنی تیلگه آلگن.
کانگرس وکیللری نینگ ایتیشیچه، مینب شهریده‌گی «شجره طیبه» قیزلر مکتبیگه قیلینگن هجومده ۱۷۵ نفر تینچ اهالی، جمله‌دن، ۱۲۰ نفر باله هلاک بۉلگن.
مکتوب مؤلفلری دستلبکی خبرلرگه کۉره، امریکا مدافعه وزیرلیگی نینگ دستلبکی تېکشیرووی بو هجوم اوچون امریکا اوردوسینی مسوول دېب تاپگنینی، بیراق پنتاگون قریب آلتی آی اۉتگنیگه قره‌مه‌ی، نه جوابگرلیکنی رسماً تن آلگنینی، نه تېرگاو نتیجه‌لرینی اعلان قیلگنینی تأکیدله‌گن.
کانگرس وکیللری تیلگه آلگن ینه بیر هجوم اۉشه کونی لامرد شهریده‌گی یاشلر سپورت سالونیگه اویوشتیریلگن هجوم بۉلیب، اونده ۲۱ نفر تینچ اهالی، جمله‌دن، یېتّی نفر باله هلاک بۉلگن.
مکتوب مؤلفلری‌نینگ ایتیشیچه، قورال-یراغ بۉییچه متخصصلر تحلیلی ویرانه‌گرچیلیک کۉلمی امریکا نینگ«پرسیژن استرایک» راکت‌سیدن فایده‌لنیلگنیگه ماس کېلیشینی کۉرسه‌تگن.
عینِ پیتده پنتاگون اوشبو اوچته هجوم نینگ بیرارته‌سی اوچون هم رسماً جوابگرلیکنی اۉز ذمّه‌سیگه آلمه‌گن. ایران اېسه امریکا اوردوسینی هجوملر نینگ عیبداری دېب قطعي اعلان قیلگن.
کانگرس وکیللری مکتوبده تره‌مپ مأموریتی اوردوده‌گی تینچ اهالینی حمایه قیلیش بۉلینمه‌سینی قیسقرتیرگنینی و بو حالت امریکانینگ یوقاریده تیلگه آلینگن هجوملرگه علاقه‌دار بۉلیش احتمالینی آشیریشی ممکنلیگینی ایتگن.
اولر نینگ معلوم قیلیشیچه، امریکا اوردوسی مرکزي قوماندانلیگیده‌گی «تینچ اهالیگه یېتکزیله‌دیگن ضررلرنی کمه‌یتیریش و اولرگه جواب بېریش» دستوری خادملری سانی ۱۰ نفردن بیرته تۉلیق ستوکالی خادمگچه قیسقه‌رتیریلگن. شونینگدېک، «تینچ اهالینی حمایه قیلیش بۉییچه مکمللیک مرکزی» خادملری هم ۳۰ نفردن یېتّی نفرگه کمه‌یتیریلگن.
کانگرس وکیللری اوشبو دستورلر مکتبلر، سپورت زللری، مهم تاسیساتلر و تینچ اهالی تۉپلنه‌دیگن جایلر نینگ منزلینی انیقلش، خوفلرنی بهالش همده تینچ اهالی آره‌سیده‌گی قربانلر نینگ آلدینی آلیش اوچون ایشلب چیقیلگنیدن خواطر بیلدیرگن.
کانگرس وکیللری امریکا مدافعه وزیرلیگیدن کوهستک، مینب و لامرد شهرلریده‌گی هجوملرده امریکا نینگ احتمالي رۉلینی انیقلش و بو باره‌ده‌گی تېکشیروو نتیجه‌لرینی اعلان قیلیشنی طلب قیلگن.
شونینگدېک، اولر ۲۶-اکتوبرگچه ایکّی هفته‌لیک مدت بېریب، پنتاگون نینگ تینچ اهالی آره‌سیده‌گی قربانلر نینگ آلدینی آلیش بۉییچه ینگی سیاستلرینی باتفصیل توشونتیریشنی سۉره‌گن.
