امریکا اوردوسی ایرانگه قرشی یکوني هجوم اوچون ینگی رېجه‌لرنی کۉریب چیقماقده. بو رېجه‌لر امریکانینگ هسته قورالیدن تشقری اېنگ کوچلی بۉمبه‌سی «برچه بۉمبه‌لر نینگ آنه‌سی» دېب اتله‌دیگن قورالدن فایده‌لنیشنی هم اۉز ایچیگه آله‌دی.
«سی‌ان‌ان» تلویزیونی (پنج‌شنبه، ۲۳میزان) بیر نېچته امریکالیک عملدارگه ته‌یه‌نیب خبر بېریشیچه، اوشبو رېجه ایران نینگ «کۉه کالنگ» هستوي انشااتیگه هجوم قیلیشنی هم نظرده توته‌‌دی.
سی‌ان‌ان منبعلری نینگ ایتیشیچه، امریکا جمهور رییسی دونالد ترامپ بویروق بېرگن تقدیرده، بو هجوم ۳نوامبر کونی بۉلیب اۉته‌دیگن امریکا آره‌لیق سیلاولریدن آلدین یاکه کېین عملگه آشیریلیشی ممکن.
«موآب» — «برچه بۉمبه‌لر نینگ آنه‌سی» نامی بیلن مشهور بۉلگن و تخنیکي جهتدن «گبو-۴۳» دېب اتله‌دیگن بۉمبه تخمیناً ۹.ه۸تُن آغیرلیککه اېگه. او هواده پارتله‌تیلگنده جوده کېنگ مقیاسده‌گی پارتلش تۉلقینینی حاصل قیله‌دی. اوشبو قورال کتّه حدودلر و یېر اوستیده‌گی نشانلرنی یۉق قیلیش اوچون مۉلجللنگن، بیراق بونکېرلرنی یۉق قیلووچی بۉمبه‌لردن فرقلی روشده، یېر نینگ قتّيق قتلملریگه چوقور کیریب باریش قابلیبیگه اېگه اېمس.
حربي رېجه‌لشتیریشدن خبردار منبعلردن بیری: «برچه بۉمبه‌لر نینگ آنه‌سی پسیکولوژی عملیاتلر و کتّه حدودلرنی تازه‌لش اوچون مۉلجللنگن قورال، اما او چوقور کیریب باریش اوچون یره‌تیلمه‌گن»، دېگن.
سی‌ان‌ان نینگ ینگی ایتیلیشیچه، آمریکا نینگ ایران هستوي مرکزلریگه، جمله‌دن، «کۉه کالنگ»گه احتمالي هجوم بۉییچه حربي رېجه‌لری «برچه بۉمبه‌لر نینگ آنه‌سی»دن فایده‌لنیش وریانتینی هم اۉز ایچیگه آلگن.
بو رېجه‌دن خبردار امریکالیک عملدارلر نینگ ایتیشیچه، اوشبو بۉمبه‌دن فایده‌لنیش تینچ اهالی آره‌سیده‌گی قربانلر سانینی آشیریشی ممکن. اینیقسه، انشااتلر اهالی یشش جایلریگه یقین بۉلسه، خوف ینه‌ده یوقاری بۉله‌دی. شونینگدېک، اونینگ اقش اوچون استراتیژیم اهمیتگه اېگه نشانلرگه قنچه‌لیک تأثیر قیلیشی باره‌سیده هم شبهه‌لر موجود.
پنناگون وکیلی‌نینگ سوالیگه جوابن: «اوروش وزیرلیگی جمهور رئیس و اوروش وزیری‌نینگ بویروقلرینی عملگه آشیریش اوچون کېنگ کۉلملی اۉپیرا‌تسیان سناریولر بۉییچه رېجه‌لشتیریش ایشلرینی آلیب باره‌دی»، دېگن.
آق اوی اېسه ترامپ ایران‌نینگ هسته قورالیگه اېگه بۉلیشی‌نینگ آلدینی آلیش اوچون برچه وریانتلرنی کۉریب چیقه‌یاتگنینی بیلدیرگن.
شو بیلن بیرگه، حاضرگچه اوشبو هجوملرنی عملگه آشیریش بۉییچه رسمي و یکوني قرار اعلان قیلینمه‌گن.
«کۉه کالنگ» نظنزده‌گی هستوي انشااتلر یقینیده جایلشگن بۉلیب، ایران اوشبو تاغ آستیده مستحکملنگن یېراستی مجموعه‌سینی برپا اېتگنی ایتیله‌دی. دونالد ترامپ اوّل هم ایران هستوي دستورینی قَیته تیکله‌گن تقدیرده، اوشبو انشااتلرنی ینه نشانگه آلیشگه تیارلیگینی بیلدیرگن اېدی.
مذکور مجموعه حقیده‌گی اوّلگی حساباتلر، جمله‌دن، صنعي یۉلداش تصویرلری، اونینگ چوقورلیگی و مستحکملیگی باره‌سیده خواطرلرنی یوزه‌گه کېلتیرگن.
اوشبو حسابات منبعلریدن بیری تره‌مپ مأموریتی کتّه کۉرینه‌دیگن هجوم اویوشتیریب، غلبه اعلان قیلیش و کېین اېران اوروشیدن چیقیشنی مقصد قیلگن، دېب حسابله‌یدی.
سی‌ان‌ان‌نینگ یازیشیچه، منبعلردن بیری اَیریم ایشلب چیقیلگن حربي وریانتلرنی «موشکبازلیککه اۉخشه‌ش کتّه شاو» دېب تعریفله‌گن.
اوشبو امریکالیک عملدارنینگ فکریچه، پنتاگون شاو-شوولی هجوم اویوشتیریش آرقه‌لی ترامپ اوچون اوروشدن سیاسي چیقیش یۉلینی یره‌تیشگه اینتیلماقده، حتا بو هجوم اوروش نینگ اعلان قیلینگن مقصدلریگه اېریشمسه هم.
